​संस्थाका सञ्चालक, कर्मचारीहरू तथा संस्थाको तर्फबाट संकलित उक्त सहयोग रकम ‘प्रधानमन्त्री दैवी प्रकोप उद्धार कोष’ को नाममा चेक मार्फत जम्मा गरिएको संस्थाका अध्यक्ष सुरेन्द्र कुमार शाह र महाप्रबन्धक डम्बर बहादुर शाहद्वारा जारी अपिल नोट मार्फत जानकारी गराइएको छ ।

​उक्त अपिलमा मिति २०८३ भदौ १० गते आएको विनाशकारी विपत्तिमा ज्यान गुमाएका नागरिकहरूप्रति हार्दिक श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गरिएको छ । साथै, विपद्मा बेपत्ता भएका आफ्ना प्रियजनको खोजी तथा खबरको प्रतीक्षामा रहेका परिवारजनको पीडा, चिन्ता र दुःखप्रति किसान सहकारी परिवारले गहिरो ऐक्यबद्धता प्रकट गरेको छ ।

​विषम राष्ट्रिय परिस्थिति र संकटको यस घडीमा प्रभावित नागरिकहरूको उद्धार, राहत तथा पुनर्स्थापना कार्यमा थप सहयोग पुर्‍याउन संस्थाले सबैमा आह्वान समेत गरेको छ । अपिल नोट मार्फत आफ्नो क्षमता र इच्छानुसार ‘प्रधानमन्त्री दैवी प्रकोप उद्धार कोष’ मा आर्थिक सहयोग उपलब्ध गराई मानवीय सेवामा हातेमालो गर्न सम्पूर्णमा हार्दिक अनुरोध गरिएको छ ।

निसर्ग हस्पिटलका कर्मचारी, स्टाफ नर्स, चिकित्सक तथा शेयर सदस्यहरूबाट कम्तीमा एक दिन बराबरको तलब सुविधा सहयोग गर्ने निर्णयसँगै तीज कार्यक्रमका लागि छुट्याइएको रकमसमेत जोडेर कुल ११ लाख ११ हजार १ सय ११ रुपैयाँ भोटेकोशी बाढीपीडितका लागि सहयोग गरिएको हस्पिटलले जनाएको छ ।

हस्पिटलले हरेक वर्ष आफ्ना महिला कर्मचारी तथा चिकित्सकहरूका लागि तीज कार्यक्रम आयोजना गर्दै आएको थियो । तर यस वर्ष भोटेकोशीमा आएको विनाशकारी बाढीले ठूलो जनधनको क्षति पुरयाएपछि तीज कार्यक्रम नगरी त्यसका लागि छुट्याइएको रकम पीडितको राहत तथा पुनस्र्थापनामा लगाउने निर्णय गरिएको हो ।

हस्पिटलका अध्यक्ष तीर्थराज पन्तले विपत्तिको समयमा आफ्नो खुसीभन्दा पीडित परिवारको आवश्यकता महत्वपूर्ण भएको बताए । ‘चाडपर्व हाम्रो खुसीका अवसर हुन् । तर अहिले धेरै परिवार दुःख र अभावमा छन् । यस्तो अवस्थामा आफ्नो खुसीको एउटा हिस्सा पीडितका लागि समर्पण गर्नु हाम्रो मानवीय दायित्व हो,’ अध्यक्ष पन्तले भने ।

उनका अनुसार तीज कार्यक्रम नगर्ने निर्णय केवल एउटा कार्यक्रम स्थगित गर्नु नभई विपत्तिमा परेका नागरिकप्रति ऐक्यबद्धता जनाउने प्रयास हो । ‘हामीले गरेको सहयोगले बाढीले पुरयाएको सम्पूर्ण क्षतिको पूर्ति गर्न नसक्ला । तर पीडामा रहेका परिवारलाई हामी उनीहरूको साथमा छौँ भन्ने भरोसा दिन सक्छौँ,’ पन्तले भने । निसर्ग हस्पिटलका कर्मचारी, स्टाफ नर्स, चिकित्सक तथा संस्थाको तर्फबाट संकलित ११ लाख ११ हजार १ सय ११ रुपैयाँ नेपाल सरकारको ‘प्रधानमन्त्री दैवी प्रकोप उद्धार कोष’ अन्तर्गत ग्लोबल आइएमई बैंकमा रहेको आधिकारिक बैंक खाता नं. ८८००४०१०१०००००५७८८ मा जम्मा गरिएको हस्पिटलले जनाएको छ ।

चाडपर्वको खुसीलाई केही समयका लागि थाती राख्दै विपत्तिमा परेका परिवारको साथमा उभिनु आफ्नो सामाजिक उत्तरदायित्व भएको हस्पिटलको भनाइ छ । निसर्ग हस्पिटलले सामाजिक उत्तरदायित्व अन्तर्गत विभिन्न मानवीय तथा सामाजिक सहयोगका कार्यक्रम सञ्चालन गर्दै आएको छ। हस्पिटलका अनुसार समाजप्रतिको जिम्मेवारीलाई केवल स्वास्थ्य सेवा प्रदान गर्ने कार्यमा सीमित नराखी विपत्तिको समयमा सहयोग, सामाजिक अभियानमा सहभागिता तथा समुदायको आवश्यकता अनुसार विभिन्न सहयोगका कार्यक्रमलाई निरन्तरता दिँदै आएको छ ।
 

सुदूरपश्चिम प्रदेश प्रहरी कार्यालय धनगढीका अनुसार बिहीबार राती सम्म कैलालीबाट सवै भन्दा बढी मानिस सम्पर्क विहीन भएको सूचना प्रहरी समक्ष पुगेको छ । कैलालीका ४० जना सम्पर्कमा आउन नसकेको सूचना प्राप्त भएको प्रदेश प्रहरी कार्यालय धनगढीका प्रबक्ता एसएसपि पदमबहादुर विष्टले बताए ।

उनका अनुसार कैलालीको पनि टीकापुर क्षेत्रका धेरै नागरिक सम्पर्कमा नआएको सूचना प्राप्त भएको छ । बिहीबार राती सम्म टीकापुर क्षेत्रका २८ जना सम्पर्कमा आउन नसकेको गुनासो परिवार श्रोतबाट उपलब्ध भएको एसएसपि विष्टले बताए ।

त्यसैगरी जोशीपुर गाउँपालिकाका ८, जानकी गाउँपालिकाका ३, धनगढी उप महानगरपालिकाका २, बर्दगोरिया गाउँपालिकाका २, गौरिगंगा नगरपालिकाका २, कैलारी गाउँपालिकाका २, घोडाघोडी नगरपालिकाका १ तथा दार्चुलाका एक जना सम्पर्कमा आउन नसकेको गुनासो जिल्ला प्रहरी कार्यालय कैलालीमा परेको प्रहरी प्रबक्ता विष्टले बताए ।

कैलाली पछि कञ्चनपुरका धेरै नागरिक सम्पर्कमा आउन नसकेको सूचना प्राप्त भएको उनले बताए । उनका अनुसार बिहीबार राती सम्म कञ्चनपुरका ४२ जना सम्पर्कमा आउन नसकेको भन्दै आफन्तजनले प्रहरी समक्ष गुनासो पेश गरेका छन् ।

त्यस्तै बाजुराका १४, बैतडीका ८, दार्चुलाका ४, डोटीका २, डडेल्धुराका १७, अछामका १ तथा बझाङका ४ जना सम्पर्कमा नआएको सूचना सम्बन्धित जिल्ला प्रहरी कार्यालयमा प्राप्त भएको प्रबक्ता विष्टले बताए । ‘यो संख्या अझै बढ्न सक्छ,’ प्रबक्ता विष्टले भने, ‘त्यसैले अहिलेनै कति सम्पर्कविहीन छन् र कती सम्पर्कमा आए भन्ने एकिन तथ्यांक प्राप्त हुन सकेको छैन ।’

चिन तर्फको तिब्बतमा हिमपहिरो फुटेर बुधबार रसुवा हुदै बग्ने भोटेकोशी नदीमा बाढी आउँदा ठुलो जनधनको क्षेति भएको छ । हाल सम्म हजारौं नागरिक सम्पर्क विहीन भएका छन् । जसका ५ सय भन्दा बढी नागरिक विदेशी रहेका छन् ।

चिनियाँ अनलाइन ग्लोबल टाइम्सका अनुसार बिहीबार बिहानसम्म उक्त तालमा करिब २० लाख घनमिटर ताल बनेको छ भने उक्त तालबाट पानी बाहिरिन थालेको छ । यी नदीहरू मिसिएर नेपाल प्रवेश गरेपछि त्रिशूली नदीका मुख्य स्रोत÷शाखा बन्छन् ।  तिब्बतबाट बगेर आउने पुरेपु र छोचेन खोला नेपालको रसुवागढी नजिक प्रवेश गरेपछि भोटेकोशीमा मिसिन्छन् । ग्लोबल टाइम्सले चिनियाँ जलस्रोत मन्त्रालयलाई उद्धृत गर्दै लेखेअनुसार आगामी तीन दिनमा उक्त तालमा थप ३० लाख घनमिटर पानी जम्मा हुने अनुमान छ । यसले उक्त ताल फुट्ने जोखिम रहेको पनि चिनियाँ सञ्चारमाध्यमले लेखेका छन् । ताल फुट्ने सम्भावनालाई ध्यानमा राखेर चिनियाँ सरकारले तयारी गरिरहेको बताइएको छ ।

प्रहरी प्रधान कार्यालयले सार्वजनिक गरेको तथ्यांकअनुसार अहिलेसम्म १७७ जनाको शव फेला परेको हो । प्रहरीका अनुसार रसुवामा २, नुवाकोटमा १२, धादिङमा २७, चितवनमा ६९, गोरखामा २०, तनुहँमा ९, पूर्वी नवलपरासीमा ३२ र पश्चिम नवलपरासीमा ६ जनाको शव फेला परेको हो  ।

अहिले खोज तथा उद्धारमा नेपाली सेना, नेपाल प्रहरी सशस्त्र प्रहरी परिचालन भएका छन् । घाइतेहरूको उद्धार गरी उपचारका लागि विभिन्न अस्पतालमा लगिएको छ ।

नेपाल पर्यटन बोर्डले पछिल्लो अपडेट सार्वजनिक गर्दै सो जानकारी दिएको हो । बोर्डका अनुसार सबैभन्दा धेरै भारतीय पर्यटक १७८ सम्पर्कविहीन छन् । नेपाली पर्यटक १२७ जना रहेका छन् । अमेरिकी पर्यटक ६५ र युक्रेनका ५३ पर्यटक सम्पर्कविहिन रहेको तथ्यांक छ ।

त्यसैगरी मलेसियाका ५१, अष्ट्रेलियाका ३५, बेलायतका ३३ र क्यानडाका २५ पर्यटक वेपत्ता रहेको तथ्यांक छ । सिंगापुरका ९, रुसका ८, जर्मनीका ८ र लात्भिया, दक्षिण अफ्रिकाका ६÷६ जना पर्यटक वेपत्ता रहेको बोर्डले जनाएको छ । बोर्डले ट्राभल एजेन्सी र कम्पनीहरूबाट तथ्यांक संकलन गरेको जनाएको छ ।