नेपालले यूएईलाई दियो १६३ रनको लक्ष्य

धनगढी । नेपाल, युएई र हङकङबीचको टी–२० क्रिकेट सिरिजको फाइनलमा नेपालले युएईलाई १६३ रनको लक्ष्य दिएको छ ।

शुक्रबार कीर्तिपुरस्थित त्रिवि मैदानमा जारी उपाधि भिडन्तमा युएईले टस जितेर फिल्डिङ रोजेपछि पहिले ब्याटिङ गरेको नेपालले ८ विकेटको क्षतिमा १६२ रन जोड्यो ।

नेपालका लागि ओपनर कुशल भुर्तेलले अर्धशतक प्रहार गरे। उनले २९ बलमा ६ चौका र ३ छक्का हिर्काए । अर्धशतक प्रहार गरेलगत्तै उनी तेस्रो विकेटको रुपमा जाहूर खानबाट ७.३ बोल्ड भएका थिए ।

त्यसअघि अर्का ओपनर आसिफ शेख ७ रन र कुशल मल्ल १ रनमै आउट भए । दुवैलाई युएईका आयान खानले बोल्ड गरेका थिए । रोहितकुमार पौडेलले १८ रन र दीपेन्द्रसिंह ऐरीले २० रन जोड्न सके । दुवैलाई युएईका अली नासीरले आउट गरेका थिए । सन्दीप जोरा १० रन र गुल्सन झा ५ रनमा आउट भएपछि नेपाल दबाबमा परेको थियो ।

सोमपाल कामी पनि व्यक्तिगत १३ रनमा आयान खानबाट बोल्ड भएका थिए । करण केसीले नटआउट २३ रन जोडे । करणले २०औं ओभरमा जाहूर खानलाई सुरुवाती पाँच बलमा रन लिन सकेनन् भने अन्तिम बलमा २ रन लिएका थिए । करणले १७ बलमा २ चौका र १ छक्का प्रहार गरे ।

नेपालले ६ ओभरको पावरप्लेमा १ विकेटको क्षतिमा ६१ रन र  पहिलो १० ओभरमा ३ विकेटको क्षतिमा ९५ जोडेको थियो। तर त्यसपछिका ओभरमा भने नेपालले लगातार विकेट गुमाउदा रनको गति केही रोकिएको थियो ।

बलिङमा युएईका आयान खानले ३ विकेट लिन सफल भए । उनले ४ ओभरमा १९ रन खर्चिए । सिरिजमा नेपालले लिग चरणका चारै खेल जितेर फाइनलमा स्थान पक्का गरेको थियो । नेपालले युएई र हङकङ दुवैविरुद्ध उत्कृष्ट खेल देखाउँदा अपराजित रहन सफल भएको हो ।

अर्को सातादेखि काठमाडौंमा सुरु हुने टी–२० विश्वकप छनोटअघि नेपालले युएई र हङकङविरुद्ध टी–२० सिरिज खेलेको हो । विश्वकप छनोटमा नेपाल समूह ‘ए’ मा छ । नेपालको समूहमा सिंगापुर, मलेसिया र ओमान छन् । नेपालले पहिलो खेल सोमबार सिंगापुरसँग त्रिवि मैदानमै खेल्नेछ ।

समूहका दुई टिम सेमिफाइनल पुग्नेछन् । सेमिफाइनल जित्ने दुई टिम आगामी वर्ष अमेरिका र वेस्ट इन्डिजमा हुने टी–२० विश्वकपमा छनोट हुनेछन् ।