भारतमा कोरोना संक्रमणबाट मृत्यु हुनेको संख्या दैनिक हजार भन्दा बढी

काठमाडौं

   पछिल्ला केही दिन यता भारतमा संक्रमितको संख्या हरेक दिन ७० हजार भन्दा धेरैले बढिरहेको छ भने मृत्यु हुनेको संख्या पनि दैनिक एक हजार भन्दा धेरै छ ।

   पछिल्लो २४ घण्टामा  भारतमा कोरोना संक्रमणका कारण १ हजार ६५ जनाको मृत्यु भएको छ । बुधबार १ हजार १६ र मंगलबार १ हजार १७ जनाको मृत्यु भएको  थियो ।

  अहिलेसम्म ३२ लाख ४९ हजार ७ सयभन्दा धेरै संक्रमित रहेको भारतमा ६० हजार ४ सय ७२ जनाको मृत्यु भइसकेको छ ।

  भारतमा एकैदिन झण्डै ७७ हजार मानिसमा कोरोना संक्रमण पुष्टि भएको छ । भारतीय सञ्चार माध्यमहरुका अनुसार बिहीबार एकैदिन ७६ हजार ८ सय २६ जनामा कोरोना संक्रमण पुष्टि भएको छ ।

 यो एकैदिन थपिने संक्रमितको संख्या मध्ये अहिलेसम्मकै उच्च संख्या हो । यसअघि गएको बुधबार ७५ हजार ९ सय ९५ जनामा संक्रमण पुष्टि भएको थियो । भारतमा नयाँ संक्रमितको संख्याले हरेक दिन नयाँ रेडर्क बनाउँदै आएको  छ ।