धनगढीले थाल्यो सडक चौडा पार्ने कामको थालनी

धनगढी । धनगढी । धनगढी उप महानगरपालिकाले बजार क्षेत्रको सडक चौडा पार्ने योजना अन्तरगत सडकको क्षत्र भित्र पर्ने संरचना हटाउन सुरु गरेको छ ।

बुधबारदेखि धनगढी उपमहानगरपालिकाले वडा नम्बर १ कैलाली पुलदेखि वडा नम्बर ८ क्याम्पस चोक सम्मको सडक छेउका संरचना हटाउन डोजर लगाएको हो ।

बुधबार मुख्य बजार स्थित सेती प्रादेशिक अस्पतालले निर्माण गरेका भवनमा उप महानगरपालिकाले डोजर लगाएको हो ।  धनगढी उप महानगरपाकिलाले हाल सञ्चालनमा रहेको सडकलाई ३० मिटर चौडा बनाउने भन्दै सो क्षेत्रमा पर्ने संरचना हटाउन भदौ १३ गते घरधनीलाई पत्राचार गरेको थियो । तर हाल सम्म पनि कसैले सडकको क्षेत्राधिकार भित्र पर्ने संरचना नहटाएपछि बुधबार डोजर प्रयोग गरी आफै संरचना हटाउन सुरु गरेको नगरप्रमुख गोपाल हमालले बताए । 

‘पहिलो चरणमा सरकारी कार्यालयका भवनमा डोजर लगाएका छौं,’ मेयर हमालले भने, ‘त्यसपछि नीजि भवनमा पनि डोजर प्रयोग गरिने छ ।’
धनगढी उप महानगरपालिकाले मुख्य बजार क्षेत्र (कैलाली पुल देखि क्याम्पसरोड) सम्मको सडक निर्माणका लागि डिपिआर तयार गरिरहेको छ । 

सडकको क्षत्र दुई हजार तीन सय मिटर लम्बाई र ३० मिटर चौडाई बनाउने गरी धनगढीले डिपिआर तयार गरिरहेको छ । डिपिआरको प्रारम्भिक विवरण अनुसार ४ लेनमा बन्ने सडकको मध्य भागमा ३० सीएम सम्मको ट्राफिक सेक्रेटरी लाईन राखिने छ । 

त्यसैगरी दाँया र बाँया डेढ–डेढ मिटरको साइकल लेन हुने छ । साईकल लेनपछि फुटपाथ र नाला हुने छ । जस्को चौडाई दुई देखि ३ मिटरको हुने छ । फुटपाथ पछि किनारमा वृक्षा रोपणका लागि थोरै ठाउँ बाँकी रहने धनगढी उप महानगरपालिकाका इन्जििनियर कमल ओझाले बताए । 

ओझाका अनुसार नयाँ सडक निर्माण गर्दा कैलालीपुल देखिको पानी पार्क मोडमा ल्याइने गरी नाली निर्माण हने छ । त्यसले मुख्य बजार क्षेत्रमा हुने डुवानको समस्या पनि समाधान हुने छ । पार्कमोडबाट अमित प्लाजा जाने बाटोलाई नालीमा परिणत गरेर सडकको पानी खोलामा मिसाईने छ । अमित प्लाजा जाने बाटोमा नाली माथी बाटो निर्माण गरेर पानीको निकास दिइने छ ।

त्यसैगरी सेती प्रादेशिक अस्पताल देखि पश्चिम क्षेत्रको पानी पनि पार्क मोडमै ल्याएर खोलामा मिसाईने गरी डिपिआर तयार भइरहेको छ । सेती प्रादेशिक अस्पतालबाट पुर्वको पानी जिल्ला प्रहरी कार्यालयको खोलामा मिसाईने गरी नाली निर्माण गरिने छ । 

सडकमा हुने सवारी चापलाई कम गर्न मुख्य बजार क्षेत्रका कम्तिमा दुई ठाउँमा पार्किङको व्यवस्थापन हुने छ । त्यसका लागि भेटेनरी अस्पतालको अगाडी र जिल्ला प्रशासन कार्यालय अगाडीको जग्गा उपयुक्त हुने देखिएको ओझा बताउँछन् । तर त्यस विषयमा अहिले छलफल भने भएको छैन ।

डिपिआर निर्माण सीभिल इन्जिनियरिङ रिसर्च एण्ड कन्सल्ट प्रा.लि ललीतपुरले गरिरहेको छ । प्रारम्भिक प्रतिवेदन अनुसार सडक निर्माणका लागि कम्तिमा ३७ करोड बजेट आवश्यक पर्ने देखिएको छ । 

धनगढी उप महानगरपाकिलाले हाल सडकको डिपिआर बनाउन र सडकको क्षेत्र भित्र पर्ने संरचना हटाउनका लागि प्रचार प्रसार गर्न भन्दै १ करोड बजेट छुट्याएको छ ।