सोमबार सम्म समुदायका ३ सय ५० जनाको स्वाव संकलन

धनगढी

  सुदूरपश्चिम प्रदेशको राजधानी धनगढीमा समुदाय स्तरमा कोरोना संक्रमण बढेपछि धनगढी उपमहानगरपालिकाले बिभिन्न वडामा समुदाय स्तरमै स्वाव संकलन गरिरहेको छ ।

 पछिल्ला केही दिन यता उपमहानगरका बिभिन्न वडामा समुदायमा कोरोना संक्रमण देखिएपछि उपमहानगरले कन्ट्रयाक्ट ट्रेसिङ्ग अन्तरगत समुदायबाट स्वाव संकलन गरि परिक्षण गराईरहेको हो ।

  सोमबार सम्म मात्र धनगढीका बिभिन्न वडाबाट ३ सय ५० जनाको पिसिआरका लागि स्वाव संकलन गरिएको धनगढी उपमहानगरपालिका स्वास्थ्य शाखाका स्वास्थ्य निरिक्षक लक्ष्मीराज उपाध्यायले जानकारी दिए । नगर क्षेत्रमा ट्राभल हिस्ट्री नभएका ब्यक्तिमा कोरोना संक्रमण देखिए पछि पिसिआर परीक्षणको दायरा बढाईएको छ । सोही अभियान अन्तरगत ६ वटा स्थानमा क्याम्प संचालन गरेको छ ।

जसमा संक्रमित भेटिएका परिवारका सदस्य, प्रत्यक्ष सम्पर्कमा आएका ब्यक्तिहरु रहेका छन् ।

सोमबार सम्म धनगढी उपमहानगरमा ३ सय ३ जनामा कोरोना संक्रमण पुष्टि भएको छ जसमा १ सय ३१ जना स्थानीय संक्रमित रहेका स्वास्थ्य निरिक्षक उपाध्यायले बताए  ।

यसैगरी संक्रमित मध्य १ सय ९८ जना संक्रमण निको भई घर फर्किसकेका र एक जनाको मृत्यु भएको पनि उनले जानकारी दिए । स्वास्थ्य निरिक्षक उपाध्यायका अनुसार वाँकी संक्रमित मध्य ६४ जना होम आईसोलेसनमा बसेका छन् भने ३४ जना सेती प्रादेशीक अस्पताल संगै नगरपालिकाले संचालन गरेका आईसोलेसनमा बसेका छन् ।

  ‘समुदायमा संक्रमण बढेपछि उप–महानगरपालिका निरन्तर कन्ट्रयाक्ट ट्रेसिङ्गका आधारमा स्वाव संकलन गर्ने र परीक्षण गर्ने काममा जुटेको छ’ धनगढी उप–महानगरपालिकाका प्रमुख नृप बहादुर वडले भने– ‘यसको दायरा बढाउदै लगिने छ, बढी जोखिम देखिएका ८ देखि १० वटा वडामा समुदायमा स्वाव संकलन गरि परिक्षण गर्ने छौं ।’

 उपमहानगरपालिकाले पुरै ध्यान कोरोना संक्रमण फैलन रोक्न तर्फ लगाएको बताउँदै नगरप्रमुख वडले यस अभियानमा नगरवासीको पनि साथ र सहयोग आवश्यक रहेको उल्लेख  गरे । उनले भने–‘हामीले गत चैत देखि नै कोरोना संक्रमण नियन्त्रणका लागि सबैसंग समन्वय गरि अघि बढेका छौं, अझै यसलाई निरन्तरता दिने छौं ।’ साथै नगरप्रमुख वडले सामाजिक दुरी कायम गरि स्वास्थ्यका मापदण्ड पालना गरी उच्च मनोवल बनाए कोरोनालाई पराजित गर्न सकिने बताउँदै सम्पुर्ण नगरवासीलाई त्यसतर्फ ध्यान दिन अपिल गरे ।

 धनगढी उप–महानगरपालिका प्रवत्ता सन्तोष मुडभरीका अनुसार वडा नं ५ को पञ्चोदय मावि, वडा नं ६ को वाशुदेवी मावि, वडा नं ७ को बेली शहरी स्वास्थ्य प्रवद्र्धन केन्द्र, वडा नं १ को कवडहल, वडा नं १ को टिम्वर कर्पोरेशन नजिक र वडा नं ४ को राष्ट्रिय तुलसीराम माविमा क्याम्प राखेर स्वाव संकलन गरिएको छ । यस अभियानमा कोभिड उप–समितिका संयोजक नारायणप्रसाद बराल र स्वास्थ्यकर्मीको टोली फिल्डमा खटिएको प्रवत्ता मुडभरीले बताए ।

 नगरपालिकाका स्वास्थ्य निरिक्षक उपाध्यायका अनुसार संकलन गरिएका स्वाव मध्य केही स्वावको मात्र परिक्षण भएको र वाँकीको नतिजा भोली सम्म आउने बताए ।