सञ्चारकर्मी पहराईको हत्या गरिएको परिवारको दावी

धनगढी

    कैलालीको सुखडमा शुक्रबार मृत अवस्थामा फेला परेकी सञ्चारकर्मी निर्मला पहराईले आत्महत्या गरेको नभई हत्या गरिएको उनका परिवारहरूले दावी गरेका छन् ।

  घोडाघोडी नगरपालिका सुखडमा रहेको कैलाली एफ.एममा कार्यरत २२ बर्षिया  पहराई ३१ भदौबाट सम्पर्क विहीन भएकी थिइन् । उनी हराएको ३ दिन पछि शुक्रबार घोडाघोडी नगरपालिका १० मा रहेको फूलबारी सामुदायिक बनमा उनको शव झुन्डिएको अवस्थामा फेला परेको थियो ।

   शनिवार धनगढीमा मृतकका आफन्तले पत्रकार सम्मेलन गरि निर्मलाले आत्महत्या नगरेको उनको हत्या भएको दावी गरेका छन् । मृतक निर्मलाका दाई बिशाल पहराईले आफ्नो बैनीको हत्या गरि झुण्डाईएको  दाबी गरे । ‘शव हेर्दा पनि थाहा हुन्छ त्यो आत्महत्या होइन हत्या हो’ उनले भने –‘बैनीको हत्या गर्नेलाई कडा कारबाही    हुनुपर्छ ।’

 उनले घटनाको गम्भिरतापुर्वक अनुसन्धान गरिदिन पनि आग्रह गरेका छन् । पहराईको शव अहिले पोस्टमार्टमको लागि सेती प्रादेशिक अस्पतालमा ल्याइएको छ । मृतक निर्मलाका दाई बिशालले भने– ‘घटनाको छानबिन नभएसम्म पोस्टमार्टम गर्न दिदैनौं ।’

घटनाको छानबिनको लागि प्रहरीले संचारकर्मी समेत रहेका स्थानीय ललित जाग्रीलाई नियन्त्रणमा लिएको छ । कैलालीका बिभिन्न अधिकारवादी संघ संस्थाले सञ्चारकर्मी पहराईको घटनाबारे छानबिनको माग गरेका छन् ।

 दलित सङ्घ, नेपाल राष्ट्रिय दलित समाज कल्याण नेपाल, मिसन अम्बेडकर र राष्ट्रिय दलित नेटवर्कले शनिवार साझा विज्ञप्ति जारी गर्दै घटनाका संलग्नहरूलाई कारबाहीको समेत माग गरिएको छ ।