बिहिवार सुदूरपश्चिममा थप ४२ जनामा कोरोना संक्रमण पुष्टि

धनगढी

 बिहिवार सुदूरपश्चिम प्रदेशमा थप ४२ जनामा कोरोना संक्रमण पुष्टि भएको छ । प्रदेशका बिभिन्न जिल्लामा रहेका ४ वटा प्रयोगशालामा गरि ४२ जनामा संक्रमण पुष्टि भएको हो ।

   सेती प्रादेशीक अस्पताल धनगढीको प्रयोगशालामा बिहिवार गरिएको परिक्षणमा कैलालीका थप २४ जनामा कोरोना संक्रमण पुष्टि भएको छ  । जसमा १७ जना धनगढी उपमहानगरपालिकाका बिभिन्न वडाका रहेका छन् ।

  सेती प्रादेशीक अस्पतालले जारी गरेको बिज्ञप्ती अनुसार  पछिल्लो २४ घण्टामा तीन सय ४९ जनाको परीक्षण गर्दा २४ जनामा संक्रमण पुष्टि भएको छ । जसमा धनगढी उपमहानगरपालिका वडा नम्बर ११ का ४ महिला र ६ पुरुष गरी १० जना, वडा नम्बर २ का चार पुरुष र वडा नम्बर १२ का एक महिला र दुई पुरुष गरी तीन जनामा संक्रमण पुष्टि भएको बिज्ञप्तीमा उल्लेख छ ।

  यस्तै लम्कीचुहा नगरपालिकाका दुई महिला र दुई पुरुष गरी चार जना, जानकी गाउँपालिकाका दुई जना र गोदावरी नगरपालिकाका एक जनामा कोरोना पुष्टि भएको बिज्ञप्तीमा उल्लेख छ ।

 जिल्ला अस्पताल बैतडीको प्रयोगशालामा गरिएको पिसिआर परिक्षणमा थप ३ जनामा कोरोना संक्रमण पुष्टि भएको छ । पछिल्लो २४ घण्टामा ८३ जनाको परीक्षण गर्दा ३ जनामा संक्रमण पुष्टि भएको हो ।

  अस्पतालका निमित्त मेडिकल सुपरिटेन्डेन्ट डाक्टर डम्बरजंग सिंहका अनुसार बैतडीका २ र दार्चुलाका १ जनालाई संक्रमण पुष्टि भएको हो । उनले बैतडीको दोगडाकेदार गाउँपालिका ३ का २१ वर्षीय पुरुष, दशरथचन्द नगरपालिका ९ का ५९ वर्षीय पुरुष र नेपाल टेलिकम दार्चुलामा कार्यरत ४७ वर्षीय पुरुषमा कोरोना पुष्टि भएको बताए ।

 यसैगरी डोटी जिल्ला अस्पतालको प्रयोगशालामा भएको परीक्षणमा ४ पुरुषमा संक्रमण पुष्टि भएको छ । १ सय २८ जनाको कोरोना परीक्षण भएकोमा ४ जनामा संक्रमण पुष्टि भएको अस्पतालले जनाएको छ । अस्पतालका प्रयोगशाला इन्चार्ज शौरभ श्रेष्ठले शिखर नगरपालिका र दिपायल सिलगढी नगरपालिकाका दुई÷दुई जनामा कोरोना पुष्टि भएको जानकारी दिए ।

 विहिवार नै डडेल्धुरा अस्पतालको प्रयोगशालामा भएको परीक्षणमा थप ११ जनामा संक्रमण पुष्टि भएको छ । पछिल्लो २४ घण्टामा ४३ जनाको कोरोना परीक्षण भएकोमा ११ जनामा संक्रमण पुष्टि भएको हो ।

 प्रयोगशालाका इन्चार्ज इश्वरी भूषालले बैतडीको पुर्चौडी नगरपालिकाका नौँ जना, पाटन नगरपालिकाका एक जना र डडेल्धुराको नवदुर्गा गाउँपालिकाका एक जनामा संक्रमण पुष्टि भएको बताए । ति मध्य डडेल्धुराको नवदुर्गा गाउँपालिकाका ४८ बर्षीय पुरुषको डडेल्धुरा अस्पतालमा उपचारका क्रममा मृत्यु भएको   छ ।