तोडफोड गर्नेमाथि कारवाहीको माग राख्दै वडा कार्यालयको सेवा बन्द

धनगढी

     जनप्रतिनिधिलाई गाली गलौच गर्नेमाथि कारवाहीको माग गर्दै  लम्कीचुहा नगरपालिका वडा नम्बर १ वडा कार्यालयले अनिश्चित कालका लागि कार्यालयबाट दिईने सेवा बन्द गरेको छ । 

  वडा अध्यक्ष जनक बहादुर बमले बिज्ञप्ति जारी गर्दै जनप्रतिनिधिलाई गालीगलौज गरी तोडफोड गर्ने व्यक्तिलाई पक्राउ गरी कारवाही नगरेसम्म वडा कार्यालयबाट प्रवाह हुने सबै सेवा बन्द हुने जनाएका छन् ।

 लम्कीचुहा नगरपालिका वडा नम्बर १ को शहिद स्मृती माविको क्वारेन्टिनमा  रहेकी एक महिलालाई बलात्कार गर्नेलाई पक्राउ सहित कारवाहीको माग गर्दै आइतबार लम्कीमा भएको प्रदर्शनमा जनप्रतिनिधिले नै बलात्कारीलाई जोगाएको भन्दै वडा कार्यालय घेराउका साथै नारबाजी गरेका थिए । उक्त क्वारेन्टिनमा बसेकी एक महिलाले  शनिबार राति क्वारेन्टिनमा स्वयमसेवक बसेका ३ जनाले आफुलाई सामुहिक बलात्कार गरेको आरोप लगाएकी थिइन् । 

  विज्ञप्तीमा वडाका जनप्रतिनिधी र कर्मचारीको सुरक्षाको प्रत्याभुतिको माग  गरिएको छ । वडा अध्यक्ष बमले जारी गरेको विज्ञप्तीमा उक्त घटनाप्रती खेद प्रकट गर्दै दोषीलाई कारवाहीको दायरामा ल्याएर पीडितलाई न्याय दिन माग पनि गरिएको छ । 

  स्थानीयको दवावपछि आईतबार बेलुका बलात्कारको आरोप लागेका तिनै जनालाई प्रहरीले पक्राउ गरेको छ । पक्राउ पर्नेमा लम्कीचुहा नगरपालिका वडा नम्बर १ का २२ वर्षीय किशोर परियार, २० वर्षीय लक्षण विक र १८ वर्षीय सर्जन विक रहेको प्रहरीले जनाएको छ ।