सुदूरपश्चिममा शुक्रवार १२० जनामा कोरोना संक्रमण पुष्टि

धनगढी

  शुक्रबार कैलालीका ९१ जना सहित सुदूरपश्चिमका थप एक सय २० जनामा कोरोना संक्रमण पुष्टि भएको छ । सेती प्रादेशिक अस्पताल सहित प्रदेशका डोटी र बैतडी जिल्ला अस्पतालका प्रयोगशालामा गरिएको परीक्षणमा थप एक सय २० जनामा संक्रमण पुष्टि भएको हो ।

  सेती प्रादेशिक अस्पतालले जारी गरेको बिज्ञप्ती अनुसार   धनगढी उप–महानगरपालिका ३६ जना, गोदावरी नगरपालिका ३२ जना, गौरीगंगा नगरपालिकाका १३ जना, जानकी गाउँपालिकाका ५ जना, घोडाघोडी नगरपालिकाका चार जना र बर्दगोरिया गाउँपालिकाका एक जनामा संक्रमण पुष्टि भएको   हो ।

 यस्तै कञ्चनपुरको भीमदत्त नगरपालिकाका दुई जना, बेलौरी, पुनरवास र झलारीका एक÷एक जनामा संक्रमण पुष्टि भएको बिज्ञप्तीमा उल्लेख छ । यस्तै सेतीकै परिक्षणमा दार्चुलाको ब्यासका थप एक जनामा पनि संक्रमण पुष्टि भएको छ । पछिल्लो २४ घण्टामा प्रयोगशालामा चार सय ८२ जनाको कोरोना परीक्षण गरिएको थियो ।

  दार्चुला र बैतडीका थप १७ जनामा कोरोना पुष्टि भएको छ । जिल्ला अस्पताल बैतडीको प्रयोगशालमा पछिल्लो २४ घण्टामा ४४ जनाको परीक्षण गरिएकोमा दुवै जिल्लाका १७ जनामा संक्रमण पुष्टि भएको हो । अस्पतालका मेडिकल रेकर्डर मोहनसिंह ठगुन्नाले दार्चुलाको महाकाली नगरपालिकाका ११ पुरुष र तीन महिला गरी १४ जनामा संक्रमण पुष्टि भएको बताए। यस्तै लेकम गाउँपालिका, बैतडीको पाटन नगरपालिका वडा नम्बर  ३  र सिगास गाउँपालिकाका एक÷एक जनामा कोरोना संक्रमण पुष्टि भएको उनले जानकारी दिए ।

  उता जिल्ला अस्पताल डोटीको प्रयोगशालामा भएको परीक्षणमा थप ६ जनामा कोरोना संक्रमण पुष्टि भएको छ । अस्पतालका प्रयोगशाला इन्चार्ज शौरभ श्रेष्ठका अनुसार डोटीको सायल र आदर्श गाउँपालिकाका दुई÷दुई जना र अछामको चौरपाटी र कमलबजारका एक÷एक जनामा संक्रमण पुष्टि भएको हो । पछिल्लो २४ घण्टामा ७७ जनाको कोरोना परीक्षण गरिएको थियो ।

 यो संगै सुदूरपश्चिममा कोरोना संक्रमितको संख्या सात हजार ४ सय ९६ पुगेको प्रदेश सामाजिक विकास मन्त्रालयले जनाएको छ  । मन्त्रालयका अनुसार प्रदेशभरी संक्रमण पुष्टि भएका मध्य ६ हजार दुई सय भन्दा बढिले कोरोना जितेका छन् ।