स्वास्थ्यमा उत्कृष्ट काम गर्ने एक जिल्लाको एक पालिका पुरष्कृत

धनगढी

 सुदूरपश्चिम प्रदेश स्वास्थ्य निर्देशनालयले हरेक जिल्लाका एक पालिकालाई स्वास्थ्य क्षेत्रमा उत्कृष्ट काम गरेको भन्दै पुरष्कृत एबं सम्मानित गरेको छ ।

 स्वास्थ्यको वार्षिक समीक्षाका क्रममा शनिबार सुदूरपश्चिमका मुख्यमन्त्री त्रिलोचन भट्टले सम्मानित एबं पुरष्कृत गरेका    छन् ।

 प्रदेशको स्वास्थ्य निर्देशनालयले ९ ओटै जिल्लाका स्थानीय तहमध्ये प्रत्येक जिल्लाका एक एकओटा स्थानीय तहहरुलाई स्वास्थ्य क्षेत्रका उत्कृष्ट स्थानीय तहको रुपमा पुरस्कृत गरेको हो । स्थानीय सरकारले स्वास्थ्य क्षेत्रमा गरेको योगदान, कार्यक्रम कार्यान्वयनलगायत विषय हेरर स्थानीय तहहरुलाई अङ्क दिएर उत्कृष्ट छनोट गरिएको जनाएको छ ।

 यस्तै प्रदेश स्वास्थ्य निर्देशनालयले छनोटका आधार तय गरेको र ती आधारमा उच्च अङ्क प्राप्त गर्ने पालिकालाई स्वास्थ्य क्षेत्रका उत्कृष्ट पालिकाको रुपमा पुरस्कृत एवम् सम्मान गरेको हो ।

कञ्चनपुरको बेदकोट नगरपालिका, कैलालीको टिकापुर नगरपालिका, डडेल्धुराको नवदुर्गा गाउँपालिका, डोटीको आदर्श गाउँपालिका, अछामको रामारोशन गाउँपालिका, बाजुराको गौमुल गाउँपालिका, बझाङ्गको जयपृथ्वी नगरपालिका, बैतडीको पाटन नगरपालिका र दार्चुलाको नौगाड गाउँपालिका उत्कृष्ट पालिकाको रुपमा पुरस्कृत भएका छन् ।

 यसैबिच स्वास्थ्य कार्यालय बैतडीका प्रमुख योगेशप्रसाद भट्ट र स्वास्थ्य कार्यालय डोटीका प्रमुख रमेश मलासीलाई उत्कृष्ट कार्यालय प्रमुखको रुपमा पुरस्कृत एवम् सम्मानित गरिएको   छ ।