दार्चुलामा पूर्व असईको हत्या

धनगढी

 दार्चुलामा पूर्व असईको हत्या भएको छ  ।

जिल्लाको लेकम गाउँपालिका–४ टकना बस्ने ४८ बर्षका पूर्व प्रहरी सहायक निरीक्षक तेजबहादुर पालको शनिबार राती हत्या भएको जिल्ला प्रहरी कार्यालय दार्चुलाका सूचना अधिकारी भास्कर चन्दले बताए ।

 उनका अनुसार घर भन्दा करिब ६ सय मिटरको दुरीमा  पालको शव फेला परेको थियो । प्रहरीको अनुसन्धानमा पालको हत्या भएको पुष्टि भएको उनले बताए ।

 घटनाको अनुसन्धान गर्न रिठाचौपताबाट प्रहरी नायब निरीक्षक लोकेन्द्र पुजारा नेतृत्वको टोली र इलाका प्रहरी कार्यालय गोकुलेश्वरबाट प्रहरी निरीक्षक खगेन्द्र सिंह साउँदको नेतृत्वमा प्रहरी टोली घट्ना स्थलमा पुगेको सूचना अधिकारी चन्दले बताए ।

 सूचना अधिकारी चन्दका अनुसार पूर्व प्रहरी सहायक निरीक्षक पालको टाउकोमा लठ्ठीले प्रहार गरेर हत्या भएको घटनास्थलमा  पुगेका प्रहरीले निष्कर्ष निकालेको छ ।

 उनको हत्या आरोपमा प्रहरीले लेकम गाउँपालिका–४ कै स्थानीय ३२ वर्षे रमेश पाललाई पक्राउ गरिएको सूचना अधिकारी चन्दले बताए ।

 उनलाई आइतबार बिहान करिब साढे ७ बजेतिर पक्राउ गरिएको हो ।