फेरि अर्को सहकारीद्धारा किसानलाई दोब्बर मुल्यमा मल बिक्री

धनगढी

  कैलालीको गौरीगंगा नगरपालिकामा रहेको एक सहकारीले तोकिएको भन्दा दोब्बर मुल्यमा किसानलाई रसायनिक मल बेच्ने गरेको भेटिएको छ ।

  मल आपुर्तिकर्ता साल्ट ट्रेडिङ कम्पनी, कृषि सामाग्री केन्द्र लिमिटेड र गौरीगंगा नगरपालिकाले संयुक्त रुपमा गरेको अनुगमनका  क्रममा गौरीगंगा नगरपालिका वडा नम्बर ९मा रहेको देउराली कृषि सहकारी संस्थाले नियम मिचेर किसानहरुलाई दोब्बर महंगोमा मल बेचेको भेटिएको हो ।

  साल्ट ट्रेड्रिङ कर्पोरेशनका अधिकृत रामचन्द्र जोशीले जिल्लाभरिका रसायनिक मल बिक्रेता सहकारीको अनुगमन  गर्ने क्रममा देउराली सहकारीले महंगोमा मल बिक्री गरेको भेटिएको बताए ।

   अनुगमनका क्रममा कैलालीकै देउराली महिला कृषि सहकारी संस्था लिमिटेडले प्रति क्वीन्टल १ हजार ८ सय रुपैंया पर्ने यूरिया मल प्रति क्वीन्टल ३ हजार रुपैंयामा बेचेको भेटिएको हो ।

   सहकारीहरु स्थानीय सरकारको मातहतमा रहेका कारण अनुगमनका क्रममा प्राप्त प्रमाणहरु गौरीगंगा नगरपालिकालाई बुझाइएको जोशीले बताए ।

  गौरिगंगा नगरपालिकाका मेयर भीम देउवाका अनुसार मंगलबार देउरालीका सवै कागजात तथा बिल जफत गरिएको छ । ‘नगर सहकारी शाखाको टोलीले मंगलबार सहकारीका सवै कागजात जफत गरेको छ’ मेयर देउवाले भने– ‘आवश्यक अध्ययन पछि दोषी भेटिए कानूनी कारवाही गरिने छ ।’

  कार्तिक १५ गते धनगढी पोष्ट न्यूज अनलाईनमा दुई गुणा महंगोमा मल विक्री भन्ने समाचार प्रकाशित भएपछि कृषि सामाग्री केन्द्र लिमिटेड र साल्ट टे«डिङ कर्पोरेसन लिमिटेड तथा स्थानीय जनप्रतिनिधीको टोलीले कार्तिक १६ गते सहकारीको अनुगमन गरेको थियो ।

 नियम अनुसार सरकारी अनुदान प्राप्त रसायनिक मल सहकारीले ढुवानी खर्च बाहेक प्रति बोरा १ रुपैंया मुनाफा राख्दै किसानलाई बेच्नु पर्दछ । कृषि सामाग्री केन्द्र लिमिटेडका अनुसार युरिया प्रति क्वीन्टल प्रति क्वीन्टल १६५२ पर्ने गरेको छ । सहकारी संस्थाले जिल्ला भित्र बढीमा प्रति क्वीन्टल १८ सयमा मल वेच्नु पर्ने हो । तर देउराली कृषि सहकारी संस्थाले भने प्रति क्वीन्टल ३ हजारमा किसानलाई यूरिया वेचेको रसिद प्राप्त भएको छ ।