सुदूरपश्चिम प्रदेशमा थप ७३ जनामा संक्रमण

धनगढी

 सुदूरपश्चिम प्रदेशमा शनिवार ७३ जना नयाँ संक्रमित थपिएका छन् । शुक्रबार ७३ जना थपिए संगै सुदूरपश्चिम  प्रदेशमा कोरोना संक्रमितको संख्या ११ हजार ६ सय ३६ पुगेको छ ।

शनिवार प्रदेशका तीन वटा प्रयोगशालामा गरिएको परिक्षणमा ७३ जनामा कोरोना संक्रमण पुष्टि भएको प्रदेश सामाजिक विकास मन्त्रालयले जनाएको छ । मन्त्रालयका अनुसार पछिल्लो २४ घण्टामा परिक्षण गरिएका स्वाव मध्य सेती प्रादेशीक अस्पतालको प्रयोगशालामा २७ जना, डडेल्धुरा अस्पतालको प्रयोगशालामा ९ जना र  अछामको कमलबजार प्रयोगशालामा ३७ जनामा संक्रमण पुष्टि भएको छ ।

 शनिवार थपिएका संक्रमितमा कैलालीका २१ जना, कंचनपुरका ६ जना, अछामका ३१ जना, बैतडीका १ जना, बझाङका २ जना, डडेल्धुराका ४ जना, दार्चुलाका ३ जना, डोटीका २ जना र अन्य जिल्लाका ३ जना रहेका छन् ।

 शनिवार सम्म प्रदेशभर गरि ९ हजार ६ सय ३२ जना संक्रमण निको भएर घर फर्केका छन् । शनिवार सेती प्रादेशिक अस्पतालमा उपचाररत कोरोना संक्रमितको मृत्यु भएको छ । यो संगै सुदूरपश्चिम प्रदेशमा कोरोना संक्रमणका कारण मृत्यु हुनेको संख्या ४१ पुगेको छ ।

 प्रादेशिक अस्पतालको कोभिड अस्थायी अस्पतालमा भेन्टिलेटरमा उपचाररत कञ्चनपुरको कृष्णपुर नगरपालिका–२ का ५८ वर्षीय संक्रमितको मृत्यु भएको सूचना अधिकारी दिलिपकुमार श्रेष्ठले जानकारी दिए ।  उनका अनुसार असोज १५ गतेदेखि उपचार गराइरहेका पुरुष निमोनियाका बिरामी थिए । उनको शनिबार दिउँसो मृत्यु भएको असपतालले जनाएको छ ।

 प्रदेशका बिभिन्न अस्पतालमा  ५६ जना कोरोना संक्रमितहरु उपचाररत रहेका छन् । १५ सय ६९ जना संक्रमित होम आईसोलेसनमा रहेको मन्त्रालयले जनाएको छ । प्रदेशभर सकृय संक्रमितको संखया १९ सय ६३ रहेको  छ ।