धनगढीमा क्षेत्रीय शहरी विकास आयोजना अन्तरगतका सडकको शिलन्यास

धनगढी

  क्षेत्रीय शहरी विकास आयोजना अन्तर्गतका सडकहरुको निर्माण कार्य धनगढीमा सुरु भएको छ ।

  बिहिवार परियोजना अन्र्तगत क्याम्पस गेट– चटकपुर सडकको नगरप्रमुख नृपबहादुर वड र उप–प्रमुख सुशीला मिश्र भट्टले शिलन्यास गरेसंगै सडक निर्माणको काम अगाडी बढेको छ ।

 धनगढीका बाहिरी सडकहरु बिस्तार तथा कालोपत्रे बनाईसक्दा पनि क्षेत्रीय शहरी विकास परियोजनाको पर्खाईमा मुख्य बजार क्षेत्रका सडक बिस्तार भएका थिएनन् । एसियाली विकास बैंकको सहयोगमा संचालन भैरहेको क्षेत्रीय शहरी विकास आयोजना अन्तरगत धनगढी उपमहानगरपालिकामा ४२ किलोमिटर सडक विस्तारका लागि २०१५ मा सम्झौता भएको थियो ।

 ‘सम्झौता भएको भएको लामो समय हुदा पनि सडक निर्माणको काम अगाडी बढ्न सकेको थिएन’ नगरप्रमुख वडले भने –‘आज निकै खुसी छु सपनाको परियोजनाले काम सुरु भएको छ ।’

 सन् २०१५ मा छुट्टयाइएको एक अर्ब ३५ करोड रुपैयाँ बजेट अपुग हुने भएकाले सडक निर्माणको काम चरणवद्धरुपमा हुने नगरप्रमुख वडले बताए । ‘पहिलो चरणमा साढे १० किलोमिटर सडक निर्माणको काम सुरु भएको छ’ नगरप्रमुख वडले भने–‘अव चाँडै दोश्रो चरणका सडक निर्माणका लागि टेन्डर हुदैछ ।’ पहिलो चरणमा काम गर्नका लागि कालिका कन्ट्रक्सनले ६८ करोड ५ लाख ९८ हजार ७ सय ४ रुपियाँको ठेक्का पाएको  छ ।

पहिलो चरणमा ठेक्का पाएको कालिका कन्ट्रक्सनले ७ वटा सडक निर्माण गर्ने छ । जस अन्तरगत गुल्म –चर्च रोड (२ हजार ७ मिटर) , धनगढी मेन रोड , ट्राफिक चौराहा देखि –कैलालीनाला ( १ हजार ३ सय ८० मिटर) , हुलाकी सडक–क्याम्पस रोड– जाखोरताल ( ७ सय मिटर) , क्याम्पस रोड– चटकपुर ( ३ हजार ६ सय ५० मिटर) , धनगढी – खुटीया स्याउले रोड ( ८ सय ७० मिटर ) , मालपोत रोड ( ४ सय ३० मिटर र हसनपुर रोड ( १ हजार १ सय ५० मिटर) रहेका छन् ।