प्रधानमन्त्रीविरुद्ध धनगढीमा अनेरास्ववियुको बयलगाडा र्याली

धनगढी

 संघिय संसदलाई असंवैधानिक रुपमा विधटन गरेको विरोधमा शक्तारुढ नेकपाकै प्रचण्ड, माधव नेतृत्वको विद्यार्थी संगठन अनेरास्ववियुले धनगढीमा बयलगाढा र्याली निकालेको छ ।

 २०६२÷०६३ को जन आन्दोलनलाई वर्तमान प्रधानमन्त्री केपि ओलीले वयलगाढाको संज्ञा दिएको र सो अभिव्यक्तिले ओली गणतन्त्र वादी नभएको प्रष्ट्याउन बयलगाढा र्याली निकालिएको अनेरास्ववियुका केन्द्रिय सदस्य डम्मर भट्टराईले बताए ।

र्याली पछि धनगढी पार्कमोडमा आयोजित सभामा बोल्दै अनेरास्ववियुका केन्द्रिय नेता सुरेन्द्र बस्नेतले जनताको मतलाई अपमान गर्ने गरी गरिएको संसद विघटन कुनैपनि हालतमा मान्य नहुने बताए ।

उनले प्रधानमन्त्री केपि ओलीमा तानाशाह प्रवृति बढ्दै गएको आरोप लगाए । ‘ताना शाही प्रवृति भएका पञ्च र राजा हरुलाई विद्यार्थी आन्दोलनले नै ढालेको थियो’ उनले भने–‘अव केपिको प्रवृतिका विरुद्ध हामी उठ्न बाध्य भएका छौं, यही आन्दोलनले उनको अस्तित्व समाप्तहुने छ ।’

अनेरा स्ववियुका केन्द्रिय नेता शुभेष पराजुलीले जनताले दिएको मतको सम्मान गर्न नसक्ने जो कोहीलाई जनताले नै पछार्ने बताए । उनले पश्चगामी बादको दिशामा जाने सवै नेता तथा कार्यकर्ताका विरुद्ध युवाहरु एक जुट भएर लाग्नुपर्नो बताए । क्याम्पसरोड बाट सुरुभएको र्याली पार्कमोडमा समापन गरिएको थियो ।