उच्च अदालतको फैसलापछि सडक आन्दोलनको बिकल्प छैन : थारु

धनगढी

 टीकापुर घटनाबारे उच्च अदालतको फैसलापछि सडक आन्दोलनमा जानुको बिकल्प बाकी नरहेको  थरुहट थारुवान संयुक्त मोर्चाका संयोजक लक्ष्मण थारुले बताएका छन् ।

  ‘उच्च अदालतको फैसला कपटपुर्ण छ । यसले सामाजिक द्धन्द्ध निम्त्याउँछ ।’ उच्च अदालत दिपायलले फैसला गरेको एक महिनापछि शनिबार कैलालीको फुलबारीमा पत्रकारहरुसँग कुरा गर्दै संयोजक थारुले भने – ‘त्यसैले हामी शान्तिपुर्ण निर्णयक आन्दोलनको तयारीमा छौं ।’

    उच्च अदालतको फैसलाले सामाजिक द्धन्द्ध निम्त्याउने काम  गरेको पनि चौधरीले बताए । ‘उच्च अदालतको फैसला अत्यन्त संकीर्ण कुण्ठा बोकेको छ, संकीर्ण र शान्ति बिरोधी छ ।’चौधरीले भने – ‘उच्च अदालतका न्यायाधिशहरुको बिबेकले यो फैसला आएको हो भन्ने मलाई बिश्वास छैन ।’    

  न्यायालयप्रति आफुहरुको बिश्वास  र आस्था भएकै कारण उच्च अदालतको निर्णयका बिरुद्ध सर्वोच्च अदालतमा जाने पनि चौधरीले बताए । ‘अदालतलाई हामी बिश्वास गथ्र्यौ र भगवान सरह मान्थ्यौं ।’ चौधरीले भने –‘उच्च अदालतको फैसलाले हामीलाई तर्साएको छैन । त्यसैले हामी सर्वोच्चमा जाँदैछौं, सर्वोच्चले न्याय गर्ने आशा छ ।’

    अदालतको निर्णयपछि दासताका बिरुद्ध, शान्ति, न्याय र  सद्भावका लागि शान्तिपुर्ण बिद्रोह गर्ने निर्णय भएको चौधरीले बताए । थरुहट थारुवान मोर्चाको हालै सम्पन्न बैठकले  धनगढीमा थरुहट महिला, युवा र बिद्यार्थीको राष्ट्रिय भेला गर्ने निर्णय गरेको छ ।  फागुन १५ र १६ गते गरिने ती भेलामा ५० हजार महिला, युवा र बिद्यार्थी सडकमा शान्तिपुर्ण रुपमा उत्रिने संयोजक चौधरीले बताए ।

  थरुहट आन्दोलन राजनैतिक आन्दोलन भएका कारण यसलाई राजनैतिक रुपमा सम्वोधन गराउनका लागि  आन्दोलन आवश्यक रहेको संयोजक चौधरीले बताए । ‘अहिले थारुहलाई दासत्व स्वीकार्ने वा आन्दोलनमा जानुपर्ने अवस्था आएको छ ।’ चौधरीले भने ‘हामी शान्ति,  न्याय र सद्भाव खोज्दैछौं । त्यसैले फागुनदेखि आन्दोलनमा जादैछौं ।’