भागरथीका हत्यारा पत्ता लगाउन प्रदेश सभा सदस्यको माग

धनगढी

 सुदूरपश्चिम प्रदेशसभाको हिउँदे अधिवेसन ६ महिना पछि आजबाट सुरु भएको छ । आजको प्रदेश सभा बैठकमा वोल्ने प्रदेश सभा सदस्यहरुले भागरथी भट्ट हत्या प्रकरणलाई प्रदेश सरकारले गम्भिरतापूर्वक नलिएको आरोप लगाएका छन् ।

   सोमबार देखी सुरु भएको सुदूरपश्चिम प्रदेश सभाको ७ औं अधिवेसनको पहिलो वैठकमा बोल्ने प्रदेश सभा सदस्यहरुले भागरथी हत्या पछि प्रदेश सरकारका तर्फबाट अनुसन्धान र छानविन प्रकृयामा कुनै भूमीका नदेखिएको आरोप लगाए ।

  बैतडीबाट निर्वाचित प्रदेशसभा सदस्य लिलाधर भट्टले बैठक सुरु हुने विक्तिकै बेन्चबाट बोल्दै घटनाको अनुसन्धान तथा छानविन प्रति प्रदेश सरकारले ध्यान नदिएको भन्दै विरोध जनाए । उनले प्रदेशमा एक पछि अर्को गर्दै बलात्कार तथा हत्या हुँदा प्रदेश सरकार हात बाँधेर बसेको आरोप उनले लगाए । ‘किशोरीको हत्या भएको ६ दिन बितिसक्दा पनि प्रदेश सरकारबाट विज्ञप्ति समेत आएन’ उनले भने–‘खै प्रदेश सरकारको प्रतिनिधी घटना स्थल पुगेको’

 प्रमुख प्रतिपक्षीदल नेपाली काँग्रेस संसदीय दलका नेता रणबहादुर रावलले घटना घटेको ६ दिन बित्दा समेत घटनाबारे सत्यतथ्य बाहिर नआउँनु दुःखद भएको बताए । ‘जनताले प्रदेश सरकारबाट ठुलो अपेक्षा गरेका थिए’ उनले भने–‘तर प्रदेश सरकार सुतेको छ, संवेदनशिल घटनामा समेत मुखदर्शक बनेको छ ।’

 उनले कंचनपुरमा निर्मला पन्तको बलात्कार पछि हत्या हुँदा सुतेको प्रदेश सरकार अहिले बैतडीमा भागरथी प्रकरणमा समेत सुतिरहेको आरोप लगाए । जनता समाजवादी पार्टी संसदीय दलका नेता कृष्णबहादुर चौधरीले बैतडीमा भागरथी  हत्या घटनामा संलग्नलाई चाँडै कानुनी दायरामा ल्याउन प्रदेश सरकार संग माग गरे ।

 बैठकको विशेष समयमा नेकपाका प्रमुख सचेतक तारा लामा तामाङले भागरथी हत्या प्रकरणमा अनुसन्धान गर्ने काम केन्द्रीय सरकारमा निहित देखिएको भन्दै सरकारको बचाउ गरे । उनले संघिय सरकारले सवै अधिकार आफ्नो हातमा लिएर प्रदेश सरकारका खुट्टा बाँधेको आरोप लगाए ।

दोगडाकादार गाउँपालिका–७ चडेपानीकी १७ वर्षीया किशोरी भागरथी भट्ट मृत अवस्थामा भेटिएकि थिइन् । प्रहरीको अनुसन्धानले भागरथीको बलात्कार पछि हत्या भएको निष्कर्ष निकालेको छ । प्रदेश सभामा नेकपाका दुई समुह पक्ष बिपक्षेमा देखिए । सुदूरपश्चिम प्रदेशमा प्रचण्ड–माधब समुहको नेतृत्वको सरकार रहेकाले त्यस पक्षका प्रदेश सभा सदस्यले सरकारको बचाउ गरे भने ओली समुहमा रहेका प्रदेश सभा सदस्यले सरकारको बिरोध गरे ।

 बैठकको पहिलो दिन ३ वटा विधेयक दर्ता भएका छन् । भूमी व्यवस्था तथा कृषि मन्त्रालयका तर्फबाट कृषि स्वास्थ्य तथा पशु सेवा सम्बन्धमा बनेको विधेयक, बीउँ विजन सम्बन्धमा बनेको विधेयक र प्रदेश दुग्ध विकास बोर्ड स्थापना तथा व्यवस्थापन सम्बन्धमा बनेको विधेयक दर्ता भएका छन् । प्रदेश सभाको अर्को बैठक फागनु ६ गतेका बस्ने छ ।