नेपालगन्ज उपमहानगरपालिकामा बुधबार रातिदेखि लकडाउन हुने

नेपालगन्ज

 बाँकेको नेपालगन्जमा आज (बुधबार) मध्यरातिबाट एक सातनका लागि लकडाउन हुने भएको छ । तिव्ररुपमा फैलिएको कोरोना संक्रमण नियन्त्रणका लागि नेपालगन्ज उपमहानगर क्षेत्रभरका लागि लकडाउन लगाउने निर्णय गरिएको हो ।

जिल्ला प्रशासन कार्यालय बाँकेले  वैशाख ८ गते मध्यरातिदेखि वैशाख १५ गते मध्यरातिसम्म नेपालगन्ज लकडाउन हुने आदेश जारी गरेको छ । लकडाउन अवधिभर लामो दूरीका सवारी साधनदेखि मान्छे समेत सडकमा हिँडडुल गर्न पाउने छैनन् । खाद्यान्न किनमेल गर्न र अत्यावश्यक काममा हिँड्न भने पाइनेछ ।

बाकेका प्रमुख जिल्ला अधिकारी शिवराम  गेलालले जारी गरेको सूचनामा दैनिक उपभोग्य बस्तुहरु तरकारी, खाद्य, दूध, ग्यासका पसल बिहान ६ देखि ९ बजेसम्म सञ्चालन हुने उल्लेख गरिएको छ ।

स्वास्थ्य, शान्ति सुरक्षा, विद्युत, दूरसञ्चार, खानेपानी, फोहरमैला व्यवस्थापन, ग्यास, पेट्रोलियम पदार्थ, तरकारी, खाद्य तथा दुग्ध पदार्थ, औषधी पसल, बैंकको एटीएम जस्ता अत्यावश्यक सेवाहरु एवं सार्वजनिक निर्माण कार्य, पूर्व निर्धारित परीक्षाहरु र हवाई सेवा सञ्चालन गर्न पाइने छ ।

जिल्ला प्रहरी कार्यालय बाँकेका प्रमुख एसपी ओमबहादुर रानाले लकडाउन पूर्ण रुपमा कडाई गरि अनुमति बाहेकका सबै कुराहरुमा पूर्णरुपमा रोक लगाईने बताए ।

यसअघि मङ्गलबार दिउँसो सर्वपक्षिय सर्वदलिय बैठकमा बाँके जिल्लामा कोरोना संक्रमणको …साङलो’ तोड्न लकडाउन गर्नुपर्ने छलफल भएको थियो । बैठकमा कोरोना संक्रमणका कारण अस्पताल भरिभराउ भएको र लकडाउन बाहेक अर्को विकल्प नभएको सर्वपक्षिय सुझाव दिएपछि बाँकेका प्रमुख जिल्ला अधिकारी शिवराम गेलालले विहीबारदेखि लकडाउन हुने र यो सूचना बाहिर लगिदिन भनेका थिए । पहिलो चरणमा एक साता लकडाउन गरिने र त्यसपछि आवश्यकता अनुसार थप गर्न सकिने प्रजिअ गेलालले बताए ।