बाँकेमा ८ कोरोना संक्रमितको मृत्यु

नेपालगन्ज । बाँकेमा उपचाररत थप ८ जनाको मृत्यु भएको छ । यसरी ज्यान गुमाउनेमा बाँकेका ७ र एक जना बर्दियाका संक्रमित रहेका छन्  ।

जिल्ला कोभिड–१९ संकट व्यवस्थापन केन्द्र ( डिसिसिएमसी ) बाँकेका अनुसार भेरी अस्पताल नेपालगन्जमा ६ जना र कोहलपुरस्थित नेपालगन्ज मेडिकल कलेजमा दुई जना गरि ८ जना संक्रमितको मृत्यु भएको हो ।

  डिसिसिएमसीका अनुसार नेपालगन्ज उपमहानगरपालिका–४ का ५८ वर्षीय पुरुषको भेरी अस्पतालमा उपचारको क्रममा शनिबार बिहान ९ बजे मृत्यु भएको अस्पतालले जनाएको छ । वैशाख १७ गते कोरोना संक्रमण पुष्टि भएका उनी १९ गते अस्पतालमा भर्ना भएका थिए ।

यस्तै बाँकेको जानकी गाउँपालिका–३ की ५५ वर्षीया कोरोना संक्रमित महिलाको पनि शनिबार बिहान साढे दश बजे भेरी अस्पतालमा मृत्यु भएको छ । वैशाख २० गते कोरोना संक्रमण पुष्टि भएकी उनलाई २३ गते अस्पताल भर्ना गरिएको थियो ।

यसैगरी नेपालगन्ज उपमहानगरपालिका–२ का ७४ वर्षीय पुरुषको शनिबार बिहान साढे दश बजे नेपालगन्ज मेडिकल कलेज कोहलपुरमा उपचारको क्रममा मृत्यु भएको छ । वैशाख १८ गते कोरोना संक्रमण पुष्टि भएपछि उनी अस्पताल भर्ना भएका थिए ।

यसअघि बाँकेमा उपचाररत थप पाँच जना कोरोना संक्रमितको मृत्यु भएको थियो । मृत्यु हुनेमा चार जना बाँकेका र एक जना बर्दियाका हुन् । बाँकेका कोरोना फोकल पर्सन ओलीका अनुसार नेपालगन्ज उपमहानगरपालिका–१४ की ३८ वर्षीया महिलाको शनिबार बिहान पौने सात बजे भेरी अस्पतालमा मृत्यु भएको थियो । भारतको लखिमपुरमा वैशाख १४ गते परीक्षण गर्दा कोरोना संक्रमण पुष्टि भएपछि उनी त्यसको पर्सिपल्ट भेरी अस्पतालमा भर्ना भएकी थिइन् ।

यसैगरी नेपालगन्ज उपमहानगरपालिका–१० की ३८ वर्षकै अर्की महिलाको नेपालगन्ज मेडिकल कलेज कोहलपुरमा शनिबार बिहान साढे चार बजे मृत्यु भएको छ ।

यस्तै नेपालगन्ज उपमहानगरपालिका–१ बाँकेका ६४ वर्षीय पुरुषको बेलुकी ८ बजे र नेपालगन्ज उपमहानगरपालिका १२ बाँकेका ६७ वर्षीय पुरुषको शुक्रबार अपराह्न पौने पाँच बजे भेरी अस्पतालमा मृत्यु भएको छ ।

यसैगरी बर्दियाको बढैयाताल–७ घर भएका ५२ वर्षीय पुरुषको शुक्रबार साँझ ७ बजे भेरी अस्पतालमा मृत्यु भएको तेज ओलीले जानकारी दिए ।

योसँगै बाँकेमा कोरोना संक्रमणबाट मृत्यु हुनेको संख्या १७७ पुगेको छ । बाँके भन्दा बाहिर जिल्लाका तर बाँकेमा ज्यान गुमाउनेको संख्या भने १३२ पुगेको छ ।