नेपालगञ्जमा वार्ड कार्यालय नै आइसोलेसनमा परिणत

नेपालगन्ज । नेपालगन्ज उप–महानगरपालिका वडा नम्बर १२ को कार्यालयलाई आईसोलेसन वार्ड बनाइएको छ । चार जना महिला र १० जना पुरुषलाई राख्न सकिने गरि १४ सइयाको अस्थाई आईसोलेसन  सञ्चालन गरिएको वडा अध्यक्ष बुद्धीसागर सुवेदीले जानकारी दिए ।

नगर प्रमुख राणाले कोभिड संक्रमण अन्त्य हुने निश्चित नभएका कारण भविष्यमा आईपर्न सक्ने अवस्थालाई मध्यनजर गर्दै तयारी गर्नुपर्ने बताए । उनले वडा कार्यालयमा आईसोलेसन भएपछि वडाबासीलाई सहज हुने बताए ।

वडा अध्यक्ष सुवेदीका अनुसार भाडामा बस्ने र घरमा आईसोलेसनको सहज व्यवस्था हुन नसक्नेहरुका लागि लक्षित गरि आईसोलेसन तयार गरिएको हो । केही दिनमा चिकित्सक र औषधी सहितको घरदैलो अभियान सञ्चालन गरिने कार्यालयले जनाएको छ । नेपालगन्जमा यसअघि वडा नम्बर–४ ले दुई जना चिकित्सकसहित १० शैयाको आईसोलेसन सञ्चालन गरिरहेको छ ।

उप–महानगरपालिकाले ह्वाईटहाउस र रामलिला मैदानमा आईसोलेसन केन्द्र सञ्चालन गरिरहेको छ । वडाहरुमा चिकित्सक सहितको घरदैलो र सेनिटाईजर गर्ने कार्य चलिरहेको उपप्रमुख उमा थापा मगरले जानकारी दिइन् ।