किसान सहकारीद्धारा  टीकापुर  अस्पताललाई  १ शय सिलिण्डर अक्सिजन हस्तान्तरण

धनगढी । किसान बहुउद्देश्यीय सहकारी संस्थाले टीकापुर अस्पताललाई एक शय  सिलिन्डर अक्सिजन रिफिल गरेर हस्तान्तरण गरेको छ ।सोमबारसम्म टीकापुर अस्पताललमा अक्सिजन आवश्यकता भएका ३२ जना कोभिडका बिरामीहरुको उपचार भईरहेको छ ।

कैलालीको लम्कीमा केन्द्रिय कार्यालय रहेको सहकारीले  स्थापना गरेको किसान अक्सिजन बैंक मार्फत सहकारीले सिलिण्डर हस्तान्तरण गरेको हो । सहकारीका सन्चालक समिति सदस्य सरोज कुमार शाहले अस्पतालका डाक्टर रमेश उपाध्यायलाई सिलिन्डर हस्तान्तरण गरे ।

किसान सहकारीले कोभिड १९ को दोस्रो भेरियन्टबाट प्रताडित बिरामीहरुलाई सहज अक्सिजन आपुर्तिका लागि किसान अक्सीजन बैंक सन्चालनमा ल्याएको छ ।  अक्सिजन बैंक मार्फत  कैलालीका अस्पतालहरुलाई  अक्सिजन आपुर्ति गर्दै आएको सन्चालक सदस्य  शाहले बताए ।

सहकारी संस्थाले सन्चालन गरेको अक्सीजन बैंकले यस अघि लम्की अस्पताललाई १५० थान रिफिल सिलिन्डर उपलब्ध गराई सकेको छ । स्थानिय अस्पतालहरुमा सिलिन्डर अभाव हुन नदिन संस्थाले अन्य संस्थासंगको सहकार्यमा खाली सिलिन्डर खरिद प्रक्रिया अघि बढाएको संस्थाका महाप्रबन्धक डम्बर बहादुर शाहले जानकारी गराए  ।