संसद पुनस्र्थापना नभए बिपक्षी गठबन्धन चुनाबी गठबन्धनसम्म जाने तयारी

काठमाडौं । शेर बहादुर देउवालाई प्रधामन्त्री बनाउनु पर्ने माग राखेर सर्वोच्च अदालत पुगेको बिपक्षी गठबन्धन प्रतिनिधि सभा पुनःस्थापना नभएमा भावी चुनावमा समेत मोर्चाबन्दी गरेर जाने  तयारीमा लागेको छ । प्रतिनिधि सभा पुनःस्थापना हुनेमै आशा रहे पनि चुनावसम्मको तयारीसर्वोच्च अदालतमा रिट हाल्न गएका दलहरुको छ ।

नेपाली कांग्रेस, नेकपा माओवादी केन्द्र, नेकपा एमाले (माधवकुमार नेपाल पक्ष), जनता समाजवादी पार्टी र राष्ट्रिय जनमोर्चा नेपाल प्रतिनिधि सभा बिगठन र देउवालाई प्रधानमन्त्री बनाउनु पर्ने भन्दखै १ शय ४६ सांसदको हस्ताक्षर सहित अदालत पुगेका हुन् ।

शेर बहादुर देउवालाई प्रधानमन्त्रीमा समर्थन गर्दै सुरु भएको यो गठबन्धन एमालेको केपी शर्मा ओली र जसपाको महन्थ ठाकुर र राजेन्द्र महतो पक्षको गठबन्धन बिरुद्ध थप लामो समयसम्म जाने नेताहरुले बताएका छन् ।

प्रतिनिधि सभा पुनःस्थापना भए पनि सबै भन्दा ठूलो दलको रुपमा ओली नेतृत्वको एमाले कायमै रहन्छ । लोकतन्त्र संरक्षणको सुनिश्चित नभएसम्म विपक्षी मोर्चा कायम हुने बताउँदै चुनावसम्म तालमेल हुनसक्ने नेपाली कांग्रेसका मुख्य सचेतक बालकृष्ण खाँडले संकेत गरे । ‘लोकतन्त्र संरक्षण सुनिश्चित नभएसम्म गठबन्धनबीचको तालमेल, सहकार्य र सहमति कायम रहन्छ । त्यसलाई अगाडि बढाउनु पर्छ भन्ने सबै नेताहरुको धारणा छ’, खाँडले भने, ‘लोकतान्त्रिक पद्धति र मूल्य पद्धति आत्मसात गरेका राजनीतिक दलहरुले न्यायपालिकाले स्वतन्त्र, निष्पक्ष र विवेकसम्मत ढंगले निर्णय गर्छ भन्ने छ ।

न्यायपालिकाले संविधान अनुकूलको निर्णय गरे पनि यो गठबन्धन रहिरहन्छ । किनकि सदन सामना गर्न पनि हामीलाई गठबन्धन चाहिन्छ । सडकमा जानु परयो भने पनि गठबन्धन चाहिन्छ ।’

केपी ओलीको प्रतिगमन नसच्चिदासम्म संयुक्त मोर्चा कायम हुने नेकपा माओवादी केन्द्रका प्रवक्ता नारायणकाजी श्रेष्ठले बताए । प्रतिगमन विरुद्धको मोर्चा बनाएकाले त्यो नसच्चिए चुनावसम्मै कायम रहने उनले आकलन गरे । ‘यो प्रतिगमन विरुद्धको संघर्षको क्रममा निर्माण भएको मोर्चा हो । प्रतिगमन विरुद्धको संघर्ष र लोकतन्त्रलाई रक्षा गर्ने सवालमा जति हदसम्म आवश्यक हुन्छ, त्यति हदसम्म मोर्चाबन्दी गर्ने काम हुन्छ’ श्रेष्ठले भने, ‘प्रतिगमन विरुद्धको संघर्षको मोर्चा बनेकाले आवश्यक परेमा चुनावसम्म त्यस्तो हुन सक्छ ।’