प्रदेश सभाको कार्य सम्पादन परामर्श समितिबाट हटाइए तारा लामा तामाङ

धनगढी । सुदुरपश्चिम प्रदेश सभाको कार्यसम्पादन परामर्श समितिको सदस्यबाट नेकपा एमाले सुदुरपश्चिम प्रदेश संसदिय दलका सदस्य तारा लामा तामाङलाई हटाइएको छ ।

एमाले संसदिय दलका नेता प्रकाश शाहले प्रदेश सभा सदस्य तामाङलाई कार्य सम्पादन परामर्श समितिको सदस्यबाट हटाएका हुन् । संसदिय दलका नेताले गरेको सिफारिशका आधारमा नै संसदिय समितिका सदस्यहरु छानिने गर्दछन् ।

प्रदेशसभा सचिवालयका सचिव राम सिंह धामीले तामाङको ठाउँमा दुर्गा बिकलाई कार्यसम्पादन परामर्श समितिको सदस्य बनाइएको बताए । प्रमुख सचेतक बनाइएको लगत्तै  लाल बहादुर खड्का सामाजिक बिकास मन्त्री भएपछि बिकलाई  प्रमुख सचेतकको जिम्मेवारी दिइएको हो ।

मुख्यमन्त्री त्रिलोचन भट्टले मन्त्रीमण्डल पुनर्गठन गर्नु अघिल्लो दिन तामाङलाई प्रमुख सचेतकबाट हटाइएको  थियो । तामाङ प्रदेश सभाको चुनाव भएको लगत्तैदेखि संसदिय दलका प्रमुख सचेतक रहेका थिए ।