केपी पक्षका सात जनालाई एमाले संसदिय दलले सोध्यो स्पष्टीकरण

धनगढी ।  सुदुरपश्चिमका मुख्यमन्त्री त्रिलोचन भट्टको बिपक्षमा मतदान गर्ने सात जनालाई नेकपा एमाले सुदुरपश्चिम प्रदेश सभा संसदिय दलले स्पष्टीकरण सोधेको छ ।

मुख्यमन्त्री त्रिलोचन भट्टलाई विश्वासको मत दिन जारी गरिएको ह्वीप उल्लंघन गरेको भन्दै संसदीय दलका नेता प्रका शबहादुर शाहले उनीहरुलाई २४ घण्टे स्पष्टीकरण सोधेका हुन् ।

उनीहरुलाई स्पष्टीकरण नदिए वा चित्तबुझ्दो नभए दलको विधान अनुसार कारबाही गर्ने चेतावनी समेत  दिइएको छ ।

स्पष्टीकरण सोधिनेहरुमा केपी ओली पक्षका प्रदेश सभा सदस्यहरु पठानसिंह बोहरा, लिलाधार भट्ट, रतन थापा, माया तामाङ, ग्याल्बु बोहरा, नेपालु चौधरी र बलदेव रेग्मी रहेका छन् ।

एमाले संसदिय  दलको आज (मंगलबार ) बसेको बैठकले मुख्यमन्त्री भट्टलाई बिश्वासको मत दिने निर्णय गरेको थियो । संसदिय दलको निर्णय पार्टीको निर्णय भन्दा फरक भएको भन्दै केपी पक्षका सात जनाले  मुख्यमन्त्रीको बिश्वासको बिपक्षमा मतदान गरेका थिए ।

 एमाले स्थायी कमिटीले मुख्यमन्त्रीलाई दिएको समर्थन फिर्ता लिने निर्णय गरेकोले बिपक्षमा मतदान गर्नु पर्ने भन्दै केपी पक्षकाहरुले बिपक्षमा मतदान गरेका थिए ।