केपी पक्षका सात प्रदेश सभा सदस्यलाई एमाले संसदिय दलद्धारा निलम्बन

धनगढी ।  नेकपा एमाले सुदुरपश्चिम प्रदेश सभा  संसदिय दलले मुख्यमन्त्री त्रिलोचन भट्टलाई बिश्वासको मत नदिने सात प्रदेश सभा  सदस्यहरुलाई निलम्बन गरेको छ ।

संसदिय दलले केपी ओली पक्षीय प्रदेश सभा सदस्यहरुलाई सातदेखि पन्ध्र दनको लागि निलम्बन गरेको हो ।  संसदिय दलमा माधव नेपाल पक्षको दुई तिहाइ सदस्य रहेका छन् ।

दलका नेता प्रकाश बहादुर शाहको अध्यक्षतामा सोमबार बसेको दलको सात जनालाई निलम्बन गर्ने निर्णय गरेको हो । प्रमुख सचेतक दुर्गाकुमारी विकका अनुसार पठानसिंह बोहरा र रतन थापालाई १५ दिन, बलदेव रेग्मी र लिलाधर भट्टलाई १० दिन र नेपालु चौधरी, ग्याल्बुसिंह बोहरा र माया तामाङ बोहरालाई सात दिन निलम्बन गरिएको छ ।

सात जनाले जेठ २५ गते भएको बैठकमा मुख्यमन्त्री भट्टलाई विश्वासको मत दिएका थिएनन् । उनीहरुले एमाले पार्टीले सुदुरपश्चिमको सरकारलाई दिएको समर्थन फिर्ता लिने निर्णय गरिसकेको भन्दै मुख्यमन्त्रीलाई मत दिएका थिएनन् ।

दलको बैठकमा सातै जनाको उपस्थिति थियो । तर उनीहरुले उपस्थितिमा भने हस्ताक्षर गरेनन् ।