गोदावरी नगरपालिकाद्धारा नदीजन्य पद्धार्थ उत्खनन र संकलनमा रोक

धनगढी । कैलालीको गोदावरी नगरपालिकाले आफ्नो पालिका भित्र नदीजन्य पदार्थ उत्खननमा रोक लगाएको छ । नगरपालिकाले सुचना जारी गर्दै बर्खा अवधिभरका लागि नदीजन्य पद्धार्थ उत्खनन तथ संकलनमा रोक लगाएको हो ।

यस बर्ष अषाढ, साउन र भदौ गरी ३ महिनासम्म नगरपालिका क्षेत्रमा रहेको नदी तथा खोलाहरुवाट ढुगां, गिट्टी, बालुवा, ग्राभेल आदी नदीजन्य पदार्थको उत्खनन र संकलन कार्य पूर्ण रुपमा बन्द गरिएको गोदावरी नगरपालिकाका प्रमुख प्रशासकिय अधिकृत देवराज जोशीद्धारा हस्ताक्षरित सुचनामा जनाइएकोे छ ।

नगरपालिकाले बन्दको समयमा नदीजन्य पदार्थ बोकेको ट्याक्टर भेटिएमा पहिलो पटक ६ हजार, टिप्पर भेटिएमा पहिलो पटक ८ हजार, स्काईभेटर जेसिबि भेटिएमा १० हजार र खोलामा गई थुप्रो बनाउने ब्यक्ति भेटिएमा १ सय रुपैया जरिवाना गर्ने  छ ।

दोस्रो पटक भेटिएमा पहिलो पटकको जरिवानाको ५० प्रतिशत थप गरिने, तेस्रो पटक भेटिएमा पहिलो पटकको १०० प्रतिशत थप गरिने र चौथो पटक पनि भेटिएमा गाडीलाई नै जफत गरिने सुचनामा जनाइएको छ ।

नदीजन्य पदार्थ बोकेको गाडी रातिको समयमा भेटिएमा ट्याक्टरलाई १२ हजार , टिप्परलाई १६ हजार र स्काईभेटर जेसिबीलाई २० हजार रुपैया जरिवाना गरिने छ ।