सुदुरपश्चिममा कोरोना संक्रमित एक जनाको मृत्यु, ६४ जनामा संक्रमण पुष्टि

धनगढी । सुदुरपश्चिम प्रदेशमा बिहीवार कोरोना संक्रमित एक जनाको मृत्यु भएको छ । प्रदेशमा गरिएको परिक्षणमा ६४ जनामा कोरोना संक्रमण पुष्टि भएको छ ।

स्वास्थ्य निर्देशनालय दिपायलका अनुसार  प्रदेशमा  पीसीआर बिधिबाट ३ शय ४९ नमुनाको  परिक्षण गरिएकोमा ३७ जनामा र  एन्टिजेन बिधिबाट ७ शय ४६ जनाको परिक्षण गरिएकोमा २७ जनामा कोरोना संक्रमण पुष्टि भएको छ । 

पीसीआर बिधिबाट डडेल्धुरा अस्पतालमा १३ नमुनाको परिक्षण गर्दा ३ जनामा, सेती अस्पतालमा १ शय १३ नमुनाको परिक्षण गर्दा १३ जनामा, डोटी अस्पतालमा ११ नमुनाको परिक्षण गर्दा ४ जनामा, बैतडी अस्पालमा १ शय ६४ नमुनाको परिक्षण गर्दा ३ जनामा र कमलबजार अस्पतालमा  ४८ नमुनाको परिक्षण गर्दा १४ जनामा कोरोना संक्रमण पुष्टि भएको स्वास्थ्य निर्देशनालयले जनाएको छ ।

पछिल्लो २४ घण्टामा ९४ जना कोरोना संक्रमित निको भएका छन् ।