ज्ञापन पत्र बुझ्दा बुझ्दै गयो सञ्चारमन्त्री थापाको पद

काठमाडौं ।  सञ्चार तथा सूचना प्रविधि मन्त्री नैनकला थापाको मन्त्री पद गुम्ने क्रममा पत्रकारको ज्ञापनपत्र बुझ्दै थिइन् । सर्वोच्च अदालतले मंगलबार कामचलाउ सरकारलाई मन्त्रिपरिषद् विस्तार गर्ने अधिकार नभएको आदेश दिने क्रममा थापा मन्त्रालयमा पत्रकारहरूको ज्ञापनपत्र बुझ्दै थिइन् ।

नेपाल पत्रकार महासंघक प्रतिष्ठान प्रदेश समितका अध्यक्ष बालकृष्ण अधिकारी नेतृत्वको टोली मन्त्री थापालाई ज्ञापनपत्र बुझाउन मन्त्रालय पुगेको थियो । विभिन्न कारणले प्रतिष्ठान प्रदेश अन्तर्गतका ४० शाखा सहितका ६० भन्दा बढी सञ्चार गृहका ६ सय भन्दा धेरै पत्रकार कोरोना विरुद्धको खोप लगाउन छुटेकाले उनीहरूलाई खोपका लागि व्यवस्था गरिदिन उनीहरूले माग गरेका थिए ।

यस्तै, कोरोना महामारीको समयमा कुनै पनि पत्रकारहरुलाई कामबाट निकाल्ने गरी कुनै पनि ऐन, नियम र कार्यविधि संशोधन नगर्न, सञ्चार उद्योग र सञ्चारकर्मी दुवैलाई अलग अलग राहत प्याकेज ल्याउन, सूचना विभागले उपलब्ध गराउने प्रेस पासमा सहजीकरण गरिदिन  लगायतका माग प्रतिष्ठान प्रदेशको तर्फबाट राखिएको थियो ।

महासंघले ज्ञापनपत्र बुझाएर ध्यानकषर्ण गराइरहेकाले आफ्नो मन्त्री पद गुमेको समेत उनले थाहा पाएकी थिइनन् । सर्वोच्चको अन्तरिम आदेश अनलाइन मिडियामा सर्वत्र भएपछि मात्रै थापाले मन्त्री पद गुमेको थाहा पाएको सचिवलालयका एक कर्मचारीले बताए ।

‘मैले आज दिनभरी ज्ञापनपत्र बुझ्ने काम मात्रै काम भयो । अब ज्ञापनपत्र धेरै नल्याउनुस् है भन्दै सचिवालयका कर्मचारीलाई निर्देशन दिँदै हुनुहुन्थ्यो । त्यही बेला मन्त्री पद गुमेको खबर आयो’, ती कर्मचारीले भने । मन्त्री थापाले सञ्चार संस्था र सञ्चारकर्मीका समस्या धेरै भएकाले आफुले बुझ्न थालेको  बताएकी थिइन् ।