पहिरोका कारण पहाडी जिल्लाका दुई राजमार्ग अवरुद्ध

धनगढी

शनिबार देखी भइरहेको लगातारको बर्षाका कारण सुदूरपशिचम प्रदेशका पहाडी जिल्ला जोड्ने दुई राजमार्ग अबरुद्ध भएका छन् । बैतडीको सर्नयामा आएको पहिरोका कारण महाकाली लोकमार्ग अबरुद्ध भएपछि दार्चुलाको यातायात सेवा प्रभावित बनेको छ ।

महाकाली राजमार्ग अन्त सतबाँझ –गोकुलेश्वर सडकखण्डमा पर्ने बैतडीको सुर्नया गाउँपालिका ३ धरमघरमा पहिरो खसेपछि दार्चुला र बैतडीका केही स्थानको यातायात सेवा अबरुद्ध भएको जिल्ला प्रहरी कार्यालय बैतडीले जनाएको छ ।

सडकमाथिबाट पहिरो खसेकाले अहिले गाडीहरु बीचबाटोमै रोकिएका जिल्ला प्रहरी कार्यालय बैतडीका प्रवक्ता प्रहरी निरीक्षक बोधराज ओझाले बताए । अहिले पहिरो पन्छ्याउनका लागि प्रयास भईरहेको उनले बताए ।

लगातारको बर्षाकै कारण जयपृथ्वी राजमार्ग अन्तर्गत बैतडीको ढोल्यामोडमा पहिरो खस्दा बझाङ जिल्लाको यातायात अबरुद्ध भएको छ । मंगलबार बिहान खेसेको सो पहिरो पञ्चाउने काम भएरहेको बैतडीका प्रबक्ता प्रहरी निरिक्षक ओझाले बताए ।