सुदुरपश्चिममा पदपुर्ति शुरु गर्ने तयारीमा प्रदेश लोकसेवा आयोग

धनगढी  ।   प्रदेश लोकसेवा आयोग सुदुरपश्चिम प्रदेशले सुदुरपश्चिम प्रदेशमा रिक्त रहेका पदहरुको पदपुर्ति शुरु गर्ने तयारी गरेको छ । लोकसेवा आयोगको गठन भैसकेपछि आवश्यक कानुनहरुको निर्माण भैसकेकाले प्रदेश लोकसेवा आयोगले पदपुर्तिको प्रकृया अघि बढाउने  तयारी गरेको हो ।

‘आयोगलाई काम गर्न आवश्यक कानुनहरु बनिसकेका छन् । अब द्रुत गतिमा पदपुर्ति कहिले गर्ने भनेर हामी आतुर छौं ।’ प्रदेश लोकसेवा आयोगका सचिव दुर्गादत्त बिष्टले भने ‘मुख्यमन्त्री तथा मन्त्रीपरिषदको कार्यालयबाट रिक्त दरबन्दीको विवरण आइपुग्ने बित्तिकै पदपुर्तिका काम अघि बढाउँछौं ।’

साउन १५ गतेभित्र प्रदेशमा रहेका रिक्त पदहरुको बिबरण  उपलव्ध गराईदिन  लोकसेवा आयोगले मुख्यमन्त्री तथा मन्त्रीपरिषदको कार्याललाई आग्रह गरिसकेको छ । सचिव बिष्टका अनुसार मागेकै समयमा जानकारी आइपुगे भदौ पहिलो हप्तासम्म बिज्ञापन गरिसक्ने लक्ष्यका साथ काम भैरहेको छ ।  

बिज्ञापनमा जानका लागि तत्काल पाठ्यक्रम तयार गरिने उल्लेख गर्दै सचिव बिष्टले भने ‘पाठ्यक्रम तयार पारेपछि बार्षिक कार्यतालिका प्रकाशन गरिनेछ । बार्षिक कार्यतालिकामा कुन तहको बिज्ञापन कुन महिनामा गर्ने, कुन महिनामा परिक्षा सञ्चालन गर्र्नेे, कुन महिना अन्तरवार्ता लिने र  कुन महिनामा सिफारिश भनेर सार्वजनिक गरिनेछ ।

आयोगले पाठ्यक्रम निर्माण, प्रश्नपत्र निर्माणको कामका लागि रोष्टर निर्माणका लागि  बिषय बिज्ञ र बिशेषज्ञहरुको सुची आव्हान गरिसकेको  छ ं ।

सचिव बिष्टले आवश्यक चार कानुनहरु बनेपछि पदपुर्तिको काम शुरु गर्न लागिएको बताए । प्रदेश लोकसेवा आयोग नियमावली २०७८, प्रदेश लोकसेवा आयोग कार्यसञ्चालन निर्देशिका २०७८, लोकसेवा आयोगका पदाधिकारी, बिषयबिज्ञ र बिशेषज्ञ एवम कर्मचारीको आचारसंहिता र प्रदेश लोकसेवा आयोगको परिक्षा दस्तुर एवम खर्च व्यवस्थापन मापदण्ड २०७८  स्वीकृत भैसकेपछि आयोगले पदपुर्तिको प्रकृया शुरु गर्न लागेको हो ।

आवश्यक सबै कानुनहरु बनिसकेकाले  पदपुर्ति चाँडो गरे  प्रदेशमा रहेको कर्मचारी अभाव कम गर्न आयोग लागेको छ ।

‘आयोगले  प्रदेशभरिका प्रदेश  निजामति सेवा अन्तरगर्त रिक्त रहेका सम्पुर्ण पदहरुको प्रतिस्पर्धाका आधारमा हुने, आन्तरिक प्रतिस्पर्धाका आधारमा हुने र बढुवाबाट हुने पदपुर्तिलाई अगाडी बढाउन लागेको छ ।’ सचिव बिष्टले भने  ‘यसले गर्दा प्रदेशको सेवा प्रभावकारिता बढ्नेछ र यहाको बेरोजगारीलाई केही हदसम्म कमी गर्नेछ ।’

स्थानीय सरकार र  प्रदेश प्रहरीको पदपुर्ति गर्दा भने आयोगले लिखित परिक्षा मात्र लिनेछ । लिखित परिक्षापछिका अरु प्रकृया सम्वन्धित निकायले नै गर्नेछन् ।  सचिव बिष्टले स्थानीय तह र प्रहरीका पदपुर्तिका बारेमा आवश्यक  निर्माण हुने क्रममा रहेको र कानुन निर्माणपछि पदपुर्तिको काम हुने बताए ।

स्थापनकालादेखि नै सुदुरपश्चिम प्रदेशमा कर्मचारीहरुको अभाव रहेको छ । दरबन्दीका पदहरु रिक्त रहदा प्रदेश सरकारको काम पनि प्रभावित हुदै आएको छ । अहिलेसम्म संघीय लोकसेवा आयोगले पदपुर्ति गरेका र संघीय सरकारले प्रदेशमा खटाएका कर्मचारीका आधारमा सुदुरपश्भिम प्रदेश सञ्चालन भैरहेको छ । प्रदेश लोकसेवा आयोगले पदपुर्ति शुरु गरेपछि प्रदेशका लागि आवश्यक  कर्मचारीहरु प्रदेशमा नै  भर्ना गर्ने काम शुरु हुनेछ ।