मध्यम तथा लामो दूरीका सवारी साधन सञ्चालन

धनगढी

शनिबार देखी मध्यम तथा लामो दूरीका सवारी साधनहरू सञ्चालन भएका छन् । कोरोना संक्रमण रोकथाम तथा न्यूनीकरणका लागि भन्दै सरकारले बैशाख १६ गते देखी सवारी साधन बन्द गरेको थियो । संक्रमण न्युनीकरण भएसंगै जिल्ला भित्रका सवारी सञ्चालनको अनुमति यस अघिनै प्रशासनले दिएको थियो । शनिबार देखी भने अन्तर जिल्ला यातायातलाई सुचारु गर्न दिने सरकारले निर्णय गरेको छ ।

यसअघि स्थानीय प्रशासनबाट आन्तरिक रूपमा र काम विशेषले आएका सवारीलाई सथानीय प्रशासन मार्फत जिल्लामा प्रवेश गर्न दिइने गरिएको थियो । तर सरकारको पछिल्लो निर्णयसँगै अब भने स्वास्थ्य सुरक्षा मापदण्डको पालना गरेर सबै सवारी सञ्चालन गर्न पाइनेछन् ।

नेपाल सरकार (मन्त्रिपरिषद)को यही साउन ४ को निर्णयअनुसार यातायात सञ्चालनको व्यवस्था मिलाउन सम्बन्धित जिल्लाका जिल्ला प्रशासनले यातायात व्यवसायीलाई अनुरोध गरिएको थियो ।

मन्त्रीपरिषद्को निर्णयानुसार शैक्षिक संस्थाले विद्यार्थी परिक्षा मिति तोकेको र लोकसेवा आयोगलगायतका निकायबाट परीक्षाका कार्यक्रम सार्वजनिक भएकाले देशका विभिन्न भागबाट परीक्षार्थी आउने तथा सर्वसाधारणको आवतजावतसमेतलाई सहज बनाउन यातायतका साधन सञ्चालन गर्न दिइएको हो ।

प्रशासन कार्यालयले अनिवार्यरूपमा टिकट काटेर मात्रै यात्रा गर्न यात्रुलाई अनुरोध गरेको छ । सवारी सञ्चालन गर्दा व्यवसायीले स्वास्थ्य मापदण्डको अनिवार्य पालना गर्नुपर्ने छ ।