प्रकाश मानव अधिकार पुरस्कार टिकापुरका फिरुलाल चौधरीलाई प्रदान

धनगढी

कैलालीका सामाजिक अभियन्ता तथा मानव अधिकारकर्मी फिरुलाल चौधरीलाई यस बर्षको ‘‘प्रकाश मानव अधिकार पुरस्कार’ प्रदान गरिएको छ ।

अनौपचारिक सेवा केन्द्र (इन्सेक) ले शोषण, विपन्नता, विभेद मुक्त समाज निर्माणको अभियानमा तीन दशकदेखि क्रियाशील रहेको भन्दै चौधरीलाई ‘२७ औँ प्रकाश मानव अधिकार पुरस्कार’ बाट सम्मानित गरेको हो ।

उनलाई शनिबार एक कार्यक्रमका विच सो पुरस्कार वितरण गरिएको हो । इन्सेकका महासचिव रुद्रबहादुर चर्मकारको संयोजकत्वमा गठन भएको तीन सदस्यीय पुरस्कार छनोट समितिले साउन ४ गते जानकी गाउँपालिका बस्ने फिरूलाल चौधरीलाई पुरस्कार दिने सिफारिस गरेको थियो ।

इन्सेकले शनिबार धनगढीमा एक समारोह आयोजना गरी सुदूरपश्चिम प्रदेशका मुख्यमन्त्री त्रिलोचन भट्टको प्रमुख आतिथ्यमा सो पुरस्कार वितरण गरेको हो । अभियन्ता चौधरीलाई पुरस्कार स्वारुप नगद ५० हजार र सम्मान पत्र प्रदान गरिएको इन्सेकका सुदूरपश्चिम प्रदेश अध्यक्ष खडकराज जोशीले बताए ।

इन्सेकले इन्सेकका संस्थापक महासचिव प्रकाश काफ्लेको २०४९ साउन १६ गते नुवाकोटको घोप्टेभिरमा थाई एयर दुर्घटनामा निधन भएपछि सो पुरस्कार स्थापना गरेको थियो ।