बैतडीमा भेरोसेल खोप लगाउन सुरु

धनगढी

बैतडीमा चीन सरकारले अनुदानमा उपलब्ध गराएको भेरोसेलको पहिलो खोप लगाउन सुरु गरिएको छ ।

तोकिएका वडाका खोप केन्द्रबाट कोरोना विरुद्धको खोप लगाउने कार्य शुरु हुने  स्वास्थ्य कार्यालयका प्रमुख योगेशप्रसाद भट्टले बताए ।

उनका अनुसार स्वास्थ्य मन्त्रालयले उपले निर्धारण गरेको मापदण्ड अनुसार ५५ देखि ६० बर्ष उमेर समूहका सबै नागरिक, विद्यालयका शिक्षक, कर्मचारी, कलेजका प्राध्यापकहरु, कर्मचारी, सवारी साधनका चालक र सहचालकहरुलाई खोप लगाइने छ ।

खोप लगाउन तोकिएको खोप केन्द्रमा आफ्नो परिचय खुल्ने प्रमाणपत्र सहित उपस्थित हुन स्वास्थ्य कार्यालयले आग्रह गरेको छ । खोप अभियान अन्तर्गत आज (आइतबार)देखि पाटन नगरपालिका, डिलाशैनी गाउँपालिका र दोगडाकेदार गाउँपालिकामा तोकिएको केन्द्रमा स्वास्थ्यकर्मी खटाइएको उनले बताए ।

यस्तै साउन १९ र २० गते सिगास गाउँपालिका र पुर्चौंडी नगरपालिकामा खोप अभियान सञ्चालन हुनेछ । यसैगरी साउन २० र २१ गते पञ्चेश्वर गाउँपालिका, शिवनाथ गाउँपालिका, मेलौली नगरपालिका, दशरथचन्द नगरपालिका र सुर्नया गाउँपालिकामा खोप अभियान सञ्चालन हुने स्वास्थ्य कार्यालयका खोप सुपरभाईजर निरीक्षक हरिश भट्टले बताए ।

बैतडीमा खोप अभियानका लागि १८ हजार डोज खोप आईसकेको स्वास्थ्य प्रमुख भट्टले बताए । भेरोसेलको पहिलो मात्रा लगाएका नागरिकलाई २८ दिनभित्र दोश्रो मात्रा दिनुपर्ने हुन्छ । दोश्रो मात्रा मौज्दात राखेर खोप अभियान सञ्चालन भएको उनले बताए ।

बैतडीमा यस अघि सञ्चालन भएको खोप अभियानमा ३ हजार ४ सय ७३ जनाले दुवै मात्रा खोप लगाएका छन् भने १२ हजार ९ सय ५३ जनाले पहिलो मात्रा मात्रै लगाएका छन् ।