तुइन तर्नेक्रममा गयो २६ जनाको ज्यान

धनगढी

दार्चुलाको व्यास गाउँपालिका–२ का जयसिंह धामी तुईनबाट खसेर वेपत्ता भए । सो घटनाले अहिले देश तथा विदेशमा चर्चा बटुलेको छ ।

तर सोही ठाउँमा तुईन तर्ने क्रममा हाल सम्म २६ जना भन्दा बढीको मृत्यु भइसकेको छ । स्थानीयका अनुसार दुई दशक यता मात्रै जयसिंह धामी खसेको स्थान बाटै तुईन तर्ने क्रममा २६ जना भन्दा बढीको ज्यान गएका छन् । व्यास गाउँपालिका–२ का वडा सदस्य बिरेन्द्र बुढाथोकीका अनुसार यसरी ज्यान गुमाउनेमा व्यास गाउँपालिका–२ र ४ का नागरिक रहेका छन् ।

‘यो मैले सम्झेपछिको घटना हो’ उनले भने–‘अन्य वडा र भारतीय नागरिकको पनि तुईन तर्ने क्रममा मृत्यु भएको छ ।’ उनले महाँकालीमा पुल निर्माण कार्यका लागि पटक–पटक स्थानीयले अभियाननै चलाएको बताए ।

नदीमा झुलङ्गेपुल निर्माणकालागि गाउँलले पटक–पटक अभियाननै चलाएका छन्’ उनले भने–‘तर भारतीय सुरक्षाकर्मीले पुल राख्न दिंदैन, जसका कारण यहाँका नागरिकले तुइनबाट खसेर अकालमै ज्यान गुमाउनुपरेको छ ।’

भारतीय सुरक्षाकर्मीले सुरक्षाको कारण देखाउँदै तुईन निर्माणमा रोक लगाउने गरेको उनले बताए ।