बित्थडचिर गाउँपालिकाले ल्यायो ४९ करोड बजेट

बझाङको बित्थडचिर गाउँपालिकाले आगामी आर्थिक बर्षका लागि ४९ करोड बराबरको बजेट     ल्याएको     छ ।

     ‘शिक्षा , स्वास्थ्य, कृषि , पर्यटन ,बन बातवरण  रोजगार , उद्योग, उर्जा जडीवुटी,  दिगो आर्थिक बिकास सहित समग्र भौतिक पूर्वाधार खुशी सुखि समुन्नत  तथा  समृद्धी लागि  बित्थडचीर गाँउपालिका को आधार’ भन्ने नारा सहित चौथो गाउँ सभाबाट ४९ करोडको बजेट ल्याएको हो ।

      उपाध्यक्ष जानकी बोहराले ४९ करोड १२ लाख ८ हजार ५ सय ३६ रुपैयाँ बराबरको आयव्यय प्रस्तुत गरेकी हुन् । यस्तै गाउँ सभामा उपाध्यक्ष बोहराले आगामी आवका लागि आर्थिक, सामाजिक, वातावरण र विपद् व्यवस्थापन, पूर्वाधार, सुशासन, सेवा प्रवाह, अनुगमन एवं मूल्याङ्कन सम्बन्धी वार्षिक नीति तथा कार्यक्रम पेश गरेकी छन् ।

      नीति तथा कार्यक्रम मार्फत गाउँपालिकाको केन्द्रदेखि वडा कार्यालयसम्मको सडकलाई प्राथमिकतामा राखी बाह्रै महिना सञ्चालन हुने व्यवस्था मिलाइने उल्लेख गरिएको छ । त्यस्तै गाउँपालिकाले प्रधानमन्त्री स्वरोजगार कार्यक्रम मार्फत पूर्ण रोजगारी सिर्जना गरी समृद्ध पालिकाको सपनालाई साकार पारिने नीति लिएको छ  ।

   गाउँपालिकामा कृषि क्षेत्रको आधुनिकीकरण र विविधिकरण गर्दै व्यावसायिकरणलाई जोड दिइने नीति कार्यक्रममा सम्बोधन गरिएको    छ । त्यसैगरी ‘एक वडा, एक युवा क्लब, एक खेलमैदान’ कार्यक्रम मार्फत युवा तथा बालबालिकाहरुको क्षमता विकास गरिने भएको    छ ।

      समग्रमा बित्थडचिर गाउँपालिकाले आगामी आर्थिक वर्षमा स्वास्थ्य, शिक्षा, कृषि, पर्यटन, खेलकुद लगायत विभिन्न क्षेत्रको विकासमा जोड दिने जनाएको छ ।

      बुधबार प्रस्तुत बजेट, नीति तथा कार्यक्रम माथि तिन दिनसम्म गाउँ सभामा छलफल गरी पारित गर्ने कार्यक्रम रहेको गाउँपालिका अध्यक्ष प्रेम बहादुर बोहराले जानकारी दिए । गाउँपालिका अध्यक्ष प्रेम बहादुर बोहराको अध्यक्षतामा गाउँ सभा सुरु भएको सभामा प्रमुख प्रशासकीय अधिकृत चक्र प्रसाद भट्टले स्वागत मन्तव्य राखेका थिए । यस्तै गाउँपालिका प्रवक्ता हर्क बहादुर धामीले गाउँ सभा सञ्चालन गरेका थिए ।