छानविन टोली घटना स्थलमा गयो

धनगढी

भारतीय प्रहरीले तुईन काट्दा दार्चुलाका जयसिंह धामी महाँकालीमा वेपत्ता भइएको घटनामा छानविन गर्न गठित समिति घटनास्थल तर्फ लागेको छ ।

टोली स्थलगत अध्ययनका लागि भारतीय बाटो हुँदै गस्कु मालघाटमा लागि हिडेको छ । छानबिन समितिका संयोजक जनार्दन गौतम नेतृत्वको टोली आज बिहान भारतीय बाटो हुँदै स्थलगत अध्ययनको लागि गएको दार्चुलाकी सहायक प्रमुख जिल्ला अधिकारी ज्योत्सना भट्ट जोशीले बताइन् ।

बुधबार दार्चुलाका पत्रकार, मानवअधिकारकर्मी, राजनीतिक दल र व्यास गाउँपालिकाका जनप्रतिनिधिसँग छलफल गरेपछि टोली आज गस्कु गएको हो उनले बताइन् ।

घटा स्थलमा पुगेर थप अध्यन गर्ने उद्देश्यले टोली गस्कु गएको उनले बताइन् । टोलीले नेपाल–भारत जोड्ने तुइन लगाएको स्थानीय क्षेत्रको अवलोकन गर्नेछ ।

समितिले भारतीय एसएसबी र स्थानीयवासीले भारतीय प्रहरी थानामा दिएको उजुरीको सम्बन्धमा जानकारी लिने जनाएको छ ।  यही साउन १५ गते व्यास गाउँपालिका–२ का मालका जयसिंह धामी सदरमुकाम खलङ्गामा महाकाली नदीमा बेपत्ता भएका थिए ।

भारतीय एसएसबीले तुइन तर्ने क्रममा तुइनको तार फुकालिदिँदा घटना घटेको समाचार आएसँगै घटनाबारे अध्ययन गर्न छानबिन समिति दार्चुला पुगेको हो। बेपत्ता धामी अझै फेला परेका छैनन् । टोलीलाई १० दिनभित्र छानबिन प्रतिवेदन बुझाउन भनिएको छ ।

समितिमा सुदूरपश्चिम प्रदेशका प्रहरी नायब महानिरीक्षक पुरुषोत्तम कँडेल, राष्ट्रिय अनुसन्धान विभागका निर्देशक हुतराज थापा, सशस्त्र प्रहरी बलका प्रहरी वरिष्ठ उपरीक्षक सुरेशकुमार श्रेष्ठ र दार्चुलाका सहायक प्रमुख जिल्ला अधिकारी ज्योत्स्ना भट्ट सदस्य छन् ।