पहिरोको उच्च जोखिममा विद्यालय

धनगढी । विद्यालय भवन रहेको स्थान मुनीबाट पहिरो खसेपछि बझाङको केदारस्युँ गाउँपालिका–६ स्थित रोतागणामा रहेको भूमिदेव आधारभूत विद्याल बस्न नसकिने अवस्थामा पुगेको छ ।

पहिरोका कारण विद्यालय भवन समेत खस्ने खतरा बढेको स्थानीय बताउँछन् । ‘विद्यालय भवन अगाडीको मैदान पहिरोमा परेर भाँसिसक्यो’ विद्यालयका प्रधानाध्यापक मानबहादुर धामीले भने–‘भवन पनि उच्च जोखिममा परेको छ, यस्तोमा विद्यार्थी राखेर पठनपाठन गर्न सक्ने अवस्था छैन ।’

बझाङमा दुई साता अघि भएको अविरल वर्षा पछि विद्यालयको मैदाननै भाँसिने गरी पहिरो खसेको उनले बताए । साउन १२ गते राति भएको अविरल बर्षाका कारण रोतागणामा रहेको विद्यालयको मूलद्वार र फिल्ड पहिरोका कारण भत्किएको प्रधानाध्यापक मान धामीले बताए । भिरालो जमिनमा विद्यालय भएकाले पहिरो खस्न थालेको उनले बताए । कक्षा ८ सम्म पठनपाठन हुँदै आएको उक्त विद्यालयमा हाल २ सय ३५ विद्यार्थी अध्ययनरत छन् ।

वडाध्यक्ष काशीराम धामीले भने विद्यालयको सो समस्या पुरानै भएको बताए । पहिरो थाम्न २० लाखको ग्याबिन तारमा ढुंगा समेत राखिएको थियो’ उनले भने–‘तर पनि विद्यालयलाई सुरक्ष्ति बनाउन सकिएन, अव सो विद्यालयमा पठनपाठन गर्नु वातावरण छैन ।’

पहिरोका कारण गाउँका २० परिवारको खेत समेत पुरिएको उनले बताए । उनले अन्य ठाउँमा विद्यालय भवन बनाउन जग्गाको खोजि भइरहेको बताए । जग्गा पाए चाँडै नै अन्यत्र विद्यालय भवन बनाउने योजना रहेको वडाध्यक्ष धामीले बताए ।