जुवामा छापासँग जोडिएका पाँच प्रहरी निलम्बित

धनगढी ।  जुवा खेलिरहेको अवस्थामा प्रहरीले छापा मारेको घटनामा जोडिएका  पाँच जना प्रहरी निलम्बनमा परेका छन् ।

धनगढी उपमहानगरपालिका  ३ मिलनचौकमा  रहेको एएफसी होटलमा जुवा खेलिरहेको बेला छापा मार्ने घटनाको अनुसन्धानका लागि गठित समितिको सिफारिशका आधारमा उनीहरु निलम्बनमा परेका हुन् ।

प्रदेश प्रहरी कार्यालयका प्रवक्ता प्रहरी बरिष्ठ उपरीक्षक बिक्रम बहादुर चन्दले जुवा प्रकरणमा जोडिएका पाँच जना प्रहरीलाई निलम्बन गरिएको बताए ।

निलम्बनमा पर्नेमा  प्रदेश प्रहरी कार्यालय धनगढीमा कार्यरत प्रहरी हवल्दार नैना चन्द्र धामी, प्रहरी जवान एकेन्द्र खड्का र प्रेम सिंह धामी र जिल्ला प्रहरी कार्यालय कैलालीमा कार्यरत प्रहरी जवान कृष्ण प्रसाद जैसी र राम सिंह कुवँर रहेका छन् ।

प्रदेश प्रहरी कार्यालयले गठन गरेको प्रहरी बरिष्ठ उपरीक्षक जनकराज पाण्डेयको नेतृत्वको टोलीले उक्त घटनाको अनुसन्धान गरिरहेको छ ।