तुइन बन्द हुँदा व्यासमा खाद्यान्न अभाव हुँदै

धनगढी । भारतीय पक्षले महाँकाली नदीमा तुईन लगाउन रोक लगाएपछि दार्चुलाको व्यास गाउँपालिकामा खाद्य अभाव हुनथालेको छ । व्यास गाउँपालिका–२ का ३५ बर्षिय जयसिंह धामीको तुईन तर्ने क्रममा महाँकालीमा खसेर मृत्यु भएको थियो ।

स्थानीयले तुईनको लठ्ठा भारतीय एसएसबिले काटेको आरोप लगाएपछि विवाद बढेको हो । विवाद बढ्दा भारतीय एसएसबिले महाँकनलीमा तुईन लगाउन रोक लगाएको छ । तुईन लगाउन रोक लगाउँदा खाद्य सामाग्री ढुवानी समेत अबरुद्ध बनेको स्थानीयको गुनासो छ ।

नेपाली भु–भाग भएर व्यासमा खाद्यान्न ढुवानी गर्न निक्कै समस्या छ । स्थानीयका अनुसार बाटो निकै भिरालो र अप्ठ्योारो हुनु र ट्रयाक पुगेको सडक पहिरोका कारण हिड्न नमिल्ने भएपछि नेपाल तर्फको भुभाग भएर व्यासमा खाद्यान्न ढुवानी गर्न समस्या भएको हो ।

नेपालतर्फबाट सडकको पहुँच नभएका व्यास गाउँपालिका वडा नम्बर १, २ र ३ का बासिन्दा खाद्यान्नको अभाव खेप्न बाध्य भएको गाउँपालिकाका प्रवक्ता धिरनबहादुर बुढाथोकीले बताए ।

व्यास गाउँपालिका–२ का वडाध्यक्ष समेत रहेका बुढाथोकीका अनुसार भारतीय एसएसबीले तुइनको डोरी फुकालिदिँदा महाकाली नदीमा खसेर मालगाउँका जयसिंह धामी बेपत्ता भएपछि भारतीय पक्षले तुइन पूर्ण रुपमा बन्द गरिदिएको छ ।

गाउँपालिकाको केन्द्रसम्म ट्रयाक खोलिएको दार्चुला–तिङ्कर सडक पनि पहिरोका कारण ठाउँठाउँमा अवरुद्ध भएकाले ट्रयाक्टर मार्फत खाद्यान्न ढुवानी गर्ने विकल्प पनि बन्द भएको उनले बताए ।

ढुवानी अभावमा यहाँका जनता चामल र पीठोको अभावमा भोकभोकै बस्न बाध्य भएका छन्’ उनले भने–‘सुनसेरा र राप्लाको खाद्य डिपोमा चामल छैन, गाउँपालिकाको केन्द्रसम्म ट्रयाक खोलिएको दार्चुला–तिङ्कर सडक पनि पहिरोका कारण अवरुद्ध छ ।’ उनले सो समस्याका विषयमा प्रदेश र संघीय सरकारलाई जानकारी गराइएको भएपछि दुई वटै सरकारबाट कुनै प्रतिक्रिया नआएको उनले बताए ।

गत वर्ष वडा नम्बर २ का बासिन्दाका लागि आएको पाँच सय क्वीन्टल चामल यसअघि नै वितरण भइसकेको छ । वडा नम्बर २ को मालगाउँ, राप्ला, दुम्लिङ र कोठेधारमा सबैभन्दा बढी खाद्यान्नको अभाव भएको छ ।

उनका अनुसार त्रिदेशीय सीमानामा रहेको सीतापुल छोटी भन्सारमा पनि भारतीय एसएसबीको ज्यादतीका कारण व्यासबासी झनै समस्यामा परेका छन् । विगतमा सीतापुलदेखि सहज रुपमा दैनिक उपभोग्य लगायतका सामान ढुवानी गर्न दिंदै आएको एसएसबीले नयाँ नक्सा र जयसिंह धामी नदीमा बगेर बेपत्ता भएको घटनापछि सताउन थालेको उनले बताए ।

‘सीमा विवादका कारण सीतापुल भएर पनि आवतजावत गर्न सक्ने अवस्था छैन ।’ उनले भने–‘हात जोडेर, बिन्ती गरेर, उनीहरुलाई सलाम गरेर मात्र एसएसबीले थोरै थोरै सामान ल्याउन दिने गरेको थियो, जयसिंह धामी बेपत्ता भएको घटनापछि त्यो पनि रोकेको छ ।’

वडा नम्बर–१ का वडा अध्यक्ष अशोकसिंह बोहराले लिपुलेक, लिम्पियाधुरा सम्बन्धी विवादका कारण एसएसबीले सीमा क्षेत्रका बासिन्दालाई दुःख दिंदै आएको बताए ।