पुँजीगत र चालु खर्च नछुट्याएरै आयो छ पालिकाहरुको बजेट

धनगढी

   जनताको सबै भन्दा नजीकको सरकारको रुपमा  रहेका कैलालीका ६ वटा स्थानीय तहले डल्लो बजेट राखेर नीति तथा कार्यक्रम सार्वजनिक गरेका छन् । पुँजीगत खर्च र चालु खर्च नै नछुट्याएर उनीहरुले कार्यक्रम भने बनाएका छन् । 

  जिल्लाका गौरिगंगा नगरपालिका, मोहन्याल गाउँपालिका, बर्दगोरिया गाउँपालिका र जानकरी गाउँपालिका, घोडाघोडी नगरपालिका र लम्कीचु्हा नगरपालिकाले योजना बाडफाँड नगरी बजेट मात्र ल्याएका छैनन्, बजेटको ठुलो हिस्सा डल्लो बनाएर (पछि कार्यपालिकाबाट खर्च सक्ने गरि ) पालिकाको परषिदमा पेश गरेका छन् ।

  डल्लो बजेट राखेका स्थानीय तहले नीति तथा कार्यक्रममा कुल बजेट विनियोजन गरे पनि चालुमा कति र पूजिगत तर्फ कति बजेट रहने भन्ने समेत उल्लेख गरेका छैनन् । ती स्थानीय तहले आगामी आर्थिक बर्षका लागि कुनै कार्यक्रम समेत निर्धारण गरेको पाइदैन । गौरिगंगा नगरपालिकाले आगामी आर्थिक बर्षका लागि ७९ करोड ४० लाख ६३ हजार ६ सय ७ रुपैया बराबरको बजेट सार्वजनिक गरेको छ ।

   यसैगरी मोहन्याल गाउँपालिकाले ४६ करोड, ६६ लाख १९ हजार १ सय २० रुपैयाँ बराबरको बजेट सार्वजनिक गरेकोमा बर्दगोरिया गाउँपालिकाले ३७ करोड, ३५ लाख ६९ हजार ६ सय ७० रुपैंयाँ बराबरको बजेट विनियोजन गरेको हो ।

   कैलालीको जानकी गाउँपालिकाले ३७ करोड ८१ लाख २ हजार दुई सय ९० रुपैंयाँ बराबरको बजेट विनियोजन गरेको छ ।

  यसैगरी कैलालीको घोडाघोडी नगरपालिकाले पनि  आगामी आर्थिक बर्षको बजेटमा चालु र पूजिगत रकम बाँडफाँड गरेको छैन । घोडाघोडीले आगामी आर्थिक बर्ष २०७७÷०७८ का लागि ८१ करोड बढीको बजेट विनियोजन गरेको छ ।

   कैलालीकै लम्कीचुहा नगरपालिकाले पनि आगामी आर्थिक बर्षका लागि ९५ करोड एक लाख ४३ हजार रुपैयाको बजेट प्रस्तुत गरिएकोमा रकम बाँडफाँड भने गरेको छैन ।