गर्भवती तथा सुत्केरीलाई स्वास्थ्यकर्मीको राहत

धनगढी

  नेपाल जनस्वास्थ्य संघको सुदूरपश्चिम प्रदेश समितिले धनगढी उपमहानरपालिकाका दुई वडामा गर्भवती तथा सुत्केरी महिलाहरुलाई राहत बितरण गरेको छ ।

  मिथिला वाइल्ड लाइफ ट्रष्ट र बुअरको आर्थिक सहयोगमा संघले शनिबार उपमहानगरपालिकाको वडा नम्बर १२ जुगेडाको ए गाउँ, डी गाउँ र सिद्धार्थनगर तथा वडा नम्बर ७ का बेली र पटेला गाउँका कमजोर आर्थिक अवस्थाका ५२ गर्भवती तथा सुत्केरी महिलाहरुलाई राहत सहयोग गरेको हो ।

  जनस्वास्थ्य संघका सुदूरपश्चिम समितिका सहसचिव अशोक जोशीका अनुसार १५ केजी चामल, १ केजी, दाल, गेडागुडीका लागि १ केजी चना, २ पाकेट नुन, १५ वटा अण्डा, १ लिटर खानेतेल र फलफूल गरी एक जनालाई १ हजार ६ सय बराबरको राहत उपलब्ध गराइएको छ ।

  यस्तै संघले राहत दिएका ५२ जना गर्भवती तथा सुत्केरी महिलाहरुलाई कोभिड १९ बाट सुरक्षित रहन हात धुनका लागि साबुन र घर बाहिर निस्कनु पर्दा लगाउन मास्क समेत दिइएको सहसचिव जोशीले बताए । प्रति ब्यक्ति दुई वटा साबुन र १० वटा सर्जिकल मास्क उपलब्ध गराएको उनले जानकारी दिए ।