विद्यार्थी र अटो चालकलाई धनगढीमा सोमबारदेखी खोप लगाइने

धनगढी । धनगढी उप–महानगरपालिकाले कक्षा १२ को परिक्षामा सहभागि हुने विद्यार्थी र धनगढी भित्रका अटो रिक्सा चालकलाई सोमबार देखी कोरोना विरुद्धको खोप लगाउन सुरु गर्ने भएकोछ ।

धनगढी उप–महानगरपालिकाले विद्यालयमै गएर विद्यार्थीलाई खोप लगाएको थियो । तर केही विद्यार्थी छुटेको हुनसक्ने भन्दै त्यसता विद्यार्थीलाई भोली (सोमबार) खोप लगाइने धनगढी उप–महानगरपालिकाका स्वास्थ्य इन्चार्ज लक्ष्मी उपाध्यायले बताए ।

उनका अनुसार विद्यार्थीलाई धनगढी उप–महानगरपालिकाकै प्राङ्गणमा विहान ११ बजे देखी यस्ट्राजेनिका कम्पनिको खोप लगाइनेछ । ‘अधिकांस विद्यार्थीलाई विद्यालयमै गएर हामीले खोप लगाइसकेका छौं,’ स्वास्थ्य इन्चार्ज उपाध्यायले भने,‘छुटेका विद्यार्थीलाई भोली खोप प्रदान गर्नेछौं, ४ सय जना विद्यार्थी छुटेको हुनसक्ने अनुमान गरिएकोछ ।’

यसैगरी धनगढी उप–महानगरपालिकाले नगरभित्र रहेका अटो रिक्सा चालकलाई पनि सोमबार (भोली) कोरोना विरुद्धको खोप लगाउने भएको छ । धनगढीमा १ हजार देखी १२ सय जना सम्म अटो रिक्सा चालक रहेको हुन सक्ने अनुमान गरिएको बताउँदै उपाध्यायले ती चालकलाई कैलाली उद्योग बाणिज्य संघमा खोप लगाउने व्यवस्था गरिएको बताए ।

‘भारतबाट आउने नागरिकलाई सोझै बोकेर ल्याउने अटो चालक कोरोना संक्रमणको उच्च जोखिममा हुने गर्दछन्,’ उनले भने,‘त्यसैले उनिहरुलाई खोपको प्राथमिकतामा राखिएकोहो, १९ वटै वडाका अटो चालकलाई खोप लगाइनेछ ।’ अटो रिक्सावालाई रिक्साको ब्लुबुकका आधारमा खोप लगाइने उनले बताए ।