मानव बेचबिखन तथा ओसार पसार नियन्त्रणमा उत्कृष्ठ काम गर्ने जिल्ला प्रहरी कार्यालय कैलाली सम्मानित

धनगढी । मानव बेचबिखन तथा ओसार पसार नियन्त्रणमा सर्वोत्कृष्ट काम गरेवाफत जिल्ला प्रहरी कार्यालय कैलाली सम्मानित भएकोछ । बुधबार महिला, बालबालिका तथा जेष्ठ नागरिक मन्त्रालयले उत्कृष्ठ काम गरेवाफत कैलालीलाई सम्मानित गरेको हो ।

राष्ट्रिय योजना आयोगका माननीय सदस्य सलोनी प्रधान सिंह र मन्त्रालयका सचिव याम कुमारी खतिवडा(वास्कोटा) ले संयुक्तरुपमा जिल्ला प्रहरी कार्यालय कैलालीका प्रमुख प्रहरी उपरीक्षक विश्व अधिकारीलाई उक्त सम्मान प्रदान गरेकोहो ।

१५ औं मानब बेचबिखन तथा ओसार पसार नियन्त्रण राष्ट्रिय दिवसको अवसरमा २०७८ भदौ २० गते महिला बालबालिका तथा जेष्ठ नागरिक मन्त्रालयले मानब बेचबिखन तथा ओसार पसार नियन्त्रणमा उल्लेखनीय काम गरेको मूल्याकंन गर्दै जिल्ला प्रहरी कार्यालय कैलालीलाई सर्वोत्कृष्ट जिल्ला घोषणा गरेको थियोे ।

जिल्ला प्रहरी कार्यालय कैलालीले विगत एक बर्षमा मानब बेचबिखन तथा ओसार पसार गरेको कसुरमा १६ वटा घटनामा २६ जनालाई पक्राउ गरी मुद्दा चलाएको थियो । १६ वटा मुद्दामध्ये ९ वटा मुद्दा मानब बेचबिखनका साथसाथै जबरजस्ती करणीमा समेत चलाएको थियो ।

त्यसैगरी यस अबधिमा जिल्ला प्रहरी कार्यालय कैलालीले सहयोगी संस्था तथा भारतीय प्रहरीको सहयोग र समन्वयमा १४ बर्षीय बालिकालाई भारतको बैंगलोरबाट उद्दार गरी पारिवारिक पुनर्मिलन गराई दोषी उपर मानव बेचबिखन तथा ओसार पसार र जबरजस्ती करणीमा मुद्दा चलाएको थियो ।

सोही अवधिमा जिल्ला प्रहरी कार्यालय कैलालीले विभिन्न संघ संस्था संगको  सहयोग र समन्वयमा ८६ जना महिला, २ बालक र ३८ बालिका गरी १२६ जनालाई सिमा नाकाबाट उद्दार गरी परिवारमा फर्काईएको थियो भने ३ महिला, १७ बालक र १० बालिका गरी ३० जनालाई बेवारिसे तथा अलपत्र अवस्थामा फेलापारी निजहरुको उद्दार तथा पारिवारिक पुर्नमिलन गराएको थियो  ।

मानव बेचबिखन तथा ओसार पसार नियन्त्रणका लागी जिल्ला प्रहरी कार्यालय कैलालीले समुदाय प्रहरी साझेदारी अन्तर्गत विभिन्न जनचेतना मूलक कार्यक्रमहरु गर्नुका साथै शान्ति पुनरस्थापना गृह, माईती नेपाल जस्ता संघ संस्थाहरु संग समन्वय तथा सहकार्य गरी सीमा निगरानी, उद्दार, राहत, निशुल्क कानुनी परामर्श जाहेरी लेखन, औषधी उपचार, सुरक्षित आवास, मनोविमर्श, पारिवारिक पुनर्मिलन जस्ता सेवाहरु प्रदान गर्दै आई रहेको छ ।

सम्मान ग्रहण गर्दै जिल्ला प्रहरी कार्यालय कैलालीका प्रमुख प्रहरी उपरिक्षक विश्व अधिकारीले सम्मान पछि मानव वेचविखन तथा ओसारपसार नियन्त्रणका क्षेत्रमा थप काम गर्ने हौसला प्राप्त गरेको बताए । सम्मानका लागि जिल्ला प्रहरी कार्यालय केलालीलाई छनौट गर्ने  महिला बालबालिका तथा जेष्ठ नागरिक मन्त्रालय सम्बन्धित संघ सस्थालाई अधिकारीले धन्यवाद दिए ।