बझाङ जिल्लाका ६ वटा स्थानीय तहमा कोरोनाको संक्रमण

धनगढी,

 सुदूरपश्चिम प्रदेशको बझाङमा शनिबार ८ जना नयाँ कोरोना संक्रमित फेला परेसंगै कुल संक्रमितको संख्या ७२ पुगेको छ ।

 शनिवार राष्ट्रिय जनस्वास्थ्य प्रयोगशाला टेकु र विर अस्पतालको प्रयोगशालामा गरिएको पीसीआर परीक्षणमा बुङगल नगरपालिकाका२ महिने शिशु सहित ६ जनामा कोरोना संक्रमण देखिएको हो । यस्तै केदारस्यु गाँउपालिका वडा नम्बर–२ र ३ का २ जना पुरुषमा शनिबार कोरोना संक्रमण पुष्टी भएको छ ।

  हालसम्म बझाङ जिल्लाका ६ वटा स्थानीय तहमा कोरोनाको संक्रमण पुष्टी भएको छ । जस अन्तरगत बुंगल नगरपालिकामा सवै भन्दा बढी ३७, बित्थड चिर गाउँपालिकामा ११, केदारस्यु गाउँपालिकामा १०, खप्तड छान्ना गाउँपालिकामा ७, थलारा गाउँपालिकामा ५ र छबिस थाथिभेरा गाउँपालिकामा २ जनामा कोरोना संक्रमण पुष्टी भएको स्वास्थ्य कार्यालय बझाङका कोरोना सम्पर्क व्यक्ति नारायण जोशीले बताए ।

   जोशीका अनुसार हालसम्म जिल्लामा १७ महिला र ५५ पुरुषमा कोरोना संक्रमण पुष्टी भएको छ । जिल्ला भरी दुई महिला र दुई पुरुष गरी ४ जना कोरोना संक्रमित निको भएर घर गएका छन् ।