बिहान र राति भारतबाट सीमामा आइपुग्नेहरुको कोरोना परिक्षण हुदैन

धनगढी । कैलालीसंग सीमाना जोडिएको गौरिफण्टा नाकाबाट विहान र राती आउने नेपाली कोरोना परिक्षण विना नै नेपाल आउने गरेका छन् । गौरिफण्टा नाका हुँदै विहान ५ बजेदेखि राति १० बजेसम्म भारतबाट मानिस नेपाल आउने गर्दछन् । तर सीमामा स्थापना गरिएको स्वास्थ्य परिक्षाण केन्द्रमा र भने बिहान ६ देखि बेलुका ६ बजेसम्म मात्रै कोरोना परिक्षण हुँदै आएको छ । जसका कारण बिहान ६ बजे अघि आउने नागरिक र वेलुका ६ बजेपछि गौरिफण्टा नाका हुँदै नोपल भित्रिने नागरिक कोरोना परिक्षण विना नै नेपाल भित्रिने गर्दछन् ।

‘स्वास्थ्य परिक्षण केन्द्र विहान ६ बजेदेखि साझा ८ बजे सम्म मात्रै सञ्चालन हुँदै आएको छ,’ रिक्सा व्यवसायी धिरज शर्माले भने, ‘तर भारतबाट सीमा नाका हुँदै मानिसहरु बिहान ५ बजे देखि राति १० बजेसम्म नेपाल भित्रिने गर्दछन्, बिहान र राती आएका हरुको स्वाथ्य परिक्षण नै हुँदैन ।’

उनले बिहान र रातीको समयमा आउने नेपालीहरु स्वास्थ्य परिक्षण विना नै घर जाने गरेको बताए । गौरिफण्टा नाकामा दिल्लीबाट दिउँसो आउने सवारी राती १० बजे सम्म पुग्ने गरेको उनले बताए ।

 यसैगरी दिल्लीबाट वेलुका आउने सार्वजनिक बस बिहान ६ बजे अघि नै गौरिफण्टा नाकामा पुग्ने गरेको उनले बताए ।

गौरिफण्टा नाकामा कैलालीको धनगढी उप–महानगरपालिका र कञ्चनपुरको पुनर्वास नगरपालिकाको सहकार्यमा गौरिफण्टा नाका हुँदै नेपाल आउने नागरिकको एन्टिजेन विधिबाट कोरोना परिक्षाण गर्ने गरिएको छ । एन्टिजेन परिक्षणमा कोरोना पोजेटिभ भएकाहरुलाई धनगढी–१५  वेलीमा निर्माण गरिएको आइसोलेसन सेन्टरमा राख्ने गरिएको छ । रिपोर्ट नेगेटिभ आएकाहरु भने सोझै घर जाने गरेका छन् ।

गौरिफण्टा नाका स्वास्थय परिक्षण केन्द्रका संयोजक दिनेश ठकुल्लाले भने विहान र रातिको समयमा सीमामा आउने नागरिक स्थानीय बजारका भएको बताए । ‘उनीहरु नजिकैको बजार बाट विहान वेलुका हिड्ने गर्दछन्,’ उनले भने, ‘त्यसताको परिक्षण गर्ने गरिएको छैन, लामो दुरीबाट आएका हरु बिहान ६ बजेदेखि बेलुका ५ बजेसम्म सीमामा प्रवेस गरिसक्छन् ।’