बाजुरा कांग्रेस सभापतिमा रावलले जितेपछि रामचन्द्र पौडेलको ट्वीट :  ‘सुदूरपश्चिममा पनि परिवर्तन सम्भव छ’

काठमाण्डौं ।  बाजुरा जिल्ल्लामा कांग्रेसको सभापतिमा  रामसिंह रावलले  जितेपछि नेपाली कांग्रेसका वरिष्ठ नेता रामचन्द्र पौडेल उत्साहित देखिएका छन् ।

सभापति देउवा निकट उम्मेदवारलाई पराजित गरेर आफु निकट उम्मेदवार रामसिंह रावल बाजुराको सभापतिमा विजयी भएपछि उत्साहित हुदै नेता पौडेलले ट्विटरमा खुशी व्यक्त गरेका छन् । 

 ‘परिवर्तन सम्भव छ, सुदूरपश्चिममा पनि परिवर्तन सम्भव छ,’ सुदूरपश्चिममा सम्पन्न पहिलो जिल्ला सम्मेलनमा विजयी भएपछि उनले लेखेका छन्, ‘बाजुरामा रामसिंह रावलको विजयले संकेत गरिसक्यो । डडेल्धुराले सन्देश दिइसक्यो ।’

बाजुरामा बिहीवार राति सम्पन्न मतगणनामा  देउवा निकट उम्मेदवार कविराज पण्डितलाई ६१ मतले पराजित गर्दै रावल विजयी भएका हुन् ।

उनी दोस्रो चरणको निर्वाचनमा देउवा निकटकै अर्का उम्मेदवार चक्र शाहको समर्थनमा जिल्ला सभापति बनेका छन् ।

यसअघि भएको निर्वाचनमा कुनै पनि पक्षले कूल खसेको मत अनुसार ५१ प्रतिशत कटाउन नसकेपछि पुनः मतदान गरिएको थियो ।