भुपेन्द्र बडुवाल हत्या प्रकरण : सिद्धार्थ होटलमा पेस्तोल भेटियो

धनगढी ।  कैलालीको टीकापुरस्थित सिद्धार्थ होटेलबाट प्रहरीले दुई पेस्तोल बरामद गरेको छ । बरामद भएको पेस्तोल घटनामा फरार रहेका नवीन रावल समूहको भएको प्रहरीको दावी छ ।

पेस्तोल होटेलको कोठामा रहेको शौचालयभित्र लुकाएको पाइएको थियो । हत्यामा संलग्न आरोपमा १६ जनाविरुद्ध किटानी जाहेरी परेको छ । उनीहरुमध्ये १० जना पक्राउ परेका छन् ।

यसैगरी कैलालीको लम्कीचुहा नगरपालिका–१ का २३ वर्षीय भूपेन्द्र बडुवालको हत्याको समयमा प्रयोग भएका दुई मोटरसाइकल समेत प्रहरीले बरामद गरेको छ ।

प्रहरीले बर्दियास्थित रोयर एडभेन्चर रिसोर्टबाट घटनाको समयमा प्रयोग भएका दुई मोटरसाइकल बरामद गरेको हो । होटलबाट मोटरसाइकल बरामद गरिएपछि प्रहरीले रिसोर्ट सञ्चालक अतिश थापालाई समेत नियन्त्रणमा लगेको छ ।