कैलाली कांग्रेसको सभापतिमा संस्थापनकै चार  दावेदार

धनगढी । नेपाली कांग्रेस कैलालीको सभापतिका लागि पार्टी सभापति शेर बहादुर देउवाकै समुहका चार जना नेताहरु प्रतिस्पर्धामा उत्रिने भएका छन् । संस्थापनको पकड रहेको  कैलालीमा समुहमा नै लड्ने तयारी उनीहरुले गरेका छन् ।

कांग्रेस कैलालीका उपसभापति प्रकाश बहादुर बम, पुर्व  जिल्ला उपसभापति नारायणदत्त भट्ट, क्षेत्र नम्बर ३ का  निवर्तमान सभापति खेम राज डगौरा थारु र  महाधिवेशन प्रतिनिधि भीम बडुवालले सभापतिका लागि प्रतिस्पर्धा गर्ने तयारी गरेका छन् ।

बम र थारुले जिल्ला पार्टी सभापति नरनारयण शाहको समर्थनमा आफु उम्मेदवार हुन लागेको बताइरहेका छन् ।  भट्ट र बम जिल्ला सभापति शाहको बिरोधी समुहरुको समर्थनमा उम्मेदवार बन्न लागिरहेका हुन् ।

उपसभापति बमले कार्तिक २२ गते पत्रकार सम्मेलन गरेर आफ्नो उम्मेदवारीको घोषणा गरिसकेका छन् । लामो समयदेखि सभापतिको तयारीमा आफु लागेको उल्लेख गर्दै बमले समुह नै बनाएर निर्वाचनमा  प्रतिस्पर्धा गर्ने बताए । “मेरो सबैसँग छलफल भैरहेको छ ।”  सभापतिका  दावेदार बमले भने  “जिल्लाभरिका साथीहरु समेटेर टीम बनाएर चुनावमा जान्छौं ।”

जिल्लाभरिका  सबै पालिकाहरुमा आफ्नो पकड रहेको उल्लेख गर्दै बमले सबैको समर्थनमा जीत पनि हासिल हुने दावी गरे ।

सभापतिका अर्का दावेदार नारायण दत्त भट्ट आफु सभापतिमा प्रतिस्पर्धाको तयारीमा रहेको बताए । “म सभापतिमा लड्छु ।” कैलाली कांग्रेसको लामो समय उपसभापति भैसकेका  भट्टले भने “सबै साथीहरुको सहयोग र समर्थले म चुनाव लडिरहेको छु ।”   कांग्रेसलाई अझै बढी क्रियाशील र सशक्त बनाउन र आगामी निर्वाचनमा बिजयी बनाउन आफु सभापतिमा प्रतिस्पर्धा गर्न लागेको भट्टले बताए ।

सभापतिका दावेदार बडुवाल र भट्ट अघिल्लो जिल्ला अधिवेशनमा पनि सभापतिमा प्रतिस्पर्धा गरेका थिए । पहिलो चरणमा कसैको पनि बहुमत नआएपछि भएको दोश्रो चरणको निर्वाचनमा भट्टले बडुवाललाई समर्थन गरेका थिए । उक्त निर्वाचनमा नरनारायण शाह सभापतिमा निर्वाचित भएका थिए ।

 जिल्लाभरिका प्रतिनिधिहरुको आग्रहमा आफु सभापतिमा प्रतिस्पर्धा गर्ने तयारीमा लागेको सभापतिका दावेदार बडुवालले बताए । जिल्लाभरिका प्रतिनिधि समेट्न  प्यानल नै बनाएर अघि बढ्ने बडुवालले बताए । “अघिल्लो पटक पनि चुनाव लडे, तर टीम बनाएन, त्यसको क्षति ब्यहोर्नु परयो ।” बडुवालल् भने “यसपटक त जिल्लाभरिका साथीहरु समेटेर टीम नै बनाएर  चुनाव लड्छौं ।” बडुवालले अघिल्लो अधिवेशनको बेलामा कृष्णल सिटौलाको टीमबाट सभापतिमा प्रतिस्पर्धा गरेका थिए ।

पार्टीलाई बलियो बनाउन र र संस्थागत रुपमा संचालन गर्नका लागि सभापतिमा प्रतिस्पर्धा गर्न लागेको बडुवालले बताए ।

 सभापतिका अर्का दावेदार कैलालीको निर्वाचन क्षेत्र नम्बर ३ का निवर्तमान सभापति खेम राज डगौरा थारु  हुन् ।  पार्टीलाई संस्थागत रुपमा संचालन गर्न र बलियो बनाएर लैजान आफुले सभापतिमा प्रतिस्पर्धा गर्न लागेको चौधरीले बताए । “म अहिले पनि सार्थीहरुका बीचमा छु, उम्मेदवारीको घोषणा गर्दैछु ।” थारुले भने  “मैले  सभापतिमा प्रतिस्पर्धा गर्न लामो समयदेखि तयारी गर्दै आएको छु ।”

नेपाली कांग्रेसको १४ औ महाधिवेशन अन्तर्गत कैलालीमा कार्तिक २७ गते वडा अधिवेशन शुरु भएको थियो । मंसिर १० गते हुने जिल्ला अधिवेशनमा नयाँ नेतृत्वका लागि निर्वाचन हुनेछ । कांग्रेसमा महाधिवेशन प्रतिनिधिहरुले मात्र जिल्ला सभापतिमा  प्रतिस्पर्धा गर्न पाउँछन् ।