मतगणनाको विवाद नटुंगिदा काँग्रेस कैलालीको अधिवेशन स्थगित

धनगढी  ।  मतगणनाको बिवाद समाधान हुन नसकेपछि नेपाली कांग्रेस कैलालीको  अधिवेशन अन्तिम समयमा आएर स्थगित भएको छ । अधिवेशन राष्टिय महाधिवेशनपछि आयोजना हुने छ ।

निर्वाचन क्षेत्र नम्बर ४ मा महाधिवेशन प्रतिनिधिको मतगणनाको क्रममा उत्पन्न भएको विवाद बिहीवार साझसम्म पनि समाधान नभएपछि जिल्ला अधिवेशन स्थगित हुने भएको हो ।

काँग्रेसको १४ औ महाधिवेशन तालिका अनुसार मंसिर १० गते कैलालीमा पनि अधिवेशन हुने कार्यक्रम रहेको छ ।

जिल्ला कार्यसमिति सदस्य एवम अधिवेशन प्रचार प्रसार समितिका संयोजक नृप सुनारले अधिवेशन शुक्रवारको लागि स्थगित हुने सम्भावना बढेर गएको बताए । “ “चार नम्बरको विवाद समाधान भैनसकेकोले तोकिएकै मिति (मंसिर १० ) मा हुन नसक्ने अवस्था सृजना भएको छ ” प्रचार प्रसार समितिका संयोजक सुनारले भने  “त्यसैले अधिवेशनका बारेमा कार्यसमितिको बैठक बसेर ठोस निर्णय गर्नेछ ।”

  अधिवेशन स्थगित गर्ने बारेमा औपचारिक निर्णय गर्न  शुक्रवार ( मंसिर १० गते ) बिहान जिल्ला कार्यसमितिको बैठक बस्दैछ ।

स्थगित भएको अधिवेशन राष्टिय महाधिवेशन पछि हुनेछ । विवाद भएका जिल्लामा राष्टिय महाधिवेशनपछि जिल्ला अधिवेशन गर्ने नेपाली कांग्रेस केन्द्रिय कार्यालयले सर्कुलर गरेको छ ।

मंसिर ६ गते भएको निर्वाचन क्षेत्र नम्बर ४ को महाधिवेशन प्रतिनिधिको निर्वाचनको मतगणनामा विवाद भएपछि अझै औपचारिक रुपमा नतिजा  सार्वजनिक भएको छैन । मतगणना निष्पक्ष नभएको भन्दै दिर्घराज भाट पक्षका उम्मेदवारहरुले आपत्ति जनाएका छन् । उक्त पक्षका पाँच जनाले पुन  मतगणनाको माग गर्दै निवेदन दिएका छन् ।

 बिहीवार दिनभरि  मतगणनाको विवादका बारेमा छलफल भए पनि सहमति हुन सकेन । नेपाली कांग्रेस कैलालीको निर्वाचनका लागि खटिएका जिल्ला निर्वाचन अधिकृत टेकराज सुवेदीले निर्वाचनका कागजात नियन्त्रणमा लिएर विवादका दुवै पक्षसँग छलफल गरेका छन् ।  “विहीवारदेखि मैले विवादका बारेमा छलफल शुरु गरेको छु ।” जिल्ला निर्वाचन अधिकृत सुवेदीले भने “मैले एक एक गरेर छलफल गरे । शुक्रवारसम्म निष्कर्षमा पुगिन्छ ।” 

आफुले दुवै पक्षका उम्मेदवारहरुसँग पटक पटक छलफल गरेको उल्लेख गर्दै जिल्ला निर्वाचन अधिकृत सुवेदीले प्राप्त तथ्य र सबैको भावना समेटेर निर्णय हुने बताए ।

मंसिर ७ गते निर्वाचन क्षेत्र नम्बर ४ को मतगणना सकिएको थियो । मतगणनका बारेमा विवाद भएपछि सो क्षेत्रका मतदान अधिकृत मदन बहादुर बम सम्पर्कबिहीन भएका थिए । सो क्षेत्रका मतपत्र र अरु कागजातहरु प्रहरीको सुरक्षामा राखिएका छन् ।

क्षेत्र नम्बर ४ को महाधिवेशन प्रतिनिधिको मतगणनामा बढी मत पाउने सात जनाको बारेमा कुनै विवाद  छैन ।  त्यसपछिको क्रममा मत प्राप्त गरेका उम्मेदवारले प्राप्त गरेको मतका बारेमा भाट समुहले  शंका व्यक्त गर्दै आएको छ ।

मतगणनमका निष्पक्षता नभएको आफ्ना मतगणनमा खटिएका प्रतिनिधिहरुले पत्ता लगाएको दावी गर्दै भाट समुहका नेता उत्तम कठायतले मतगणनामा एउटाका मत अर्कोका नाममा गणना गरिएकाले आफुहरुले पुन मतगणनाको माग गरेको बताए ।

“मतगणनमा निष्पक्षता भएको छैन, एउटाले पाएका मतहरु अर्कोका नाममा गणना गरिएका छन् ।” कठायतले भने “पुन मतगणना नभएसम्म मतगणना मान्य हुदैन ।”