ट्रकले मान्छे मारेपछि कैलालीका दुई ठाउँमा पुर्वपशिचम राजमार्ग अबरुद्ध

धनगढी । कैलालीका छुट्टाछुट्टै दुई स्थानमा ट्रकले च्यापेर मान्छे मारेपछि पूर्वपश्चिम राजमार्ग अबरुद्ध गरिएको छ । सोमबार बिहान भैरहवाबाट अत्तरिया आउदै गरेको ना ६ ख ५३६६ नम्बरको मालबहाक ट्रकले गोदावरी नगरपालिका–८ स्याउले चोकमा पैदल यात्रा गरिरहेका १९ वर्षीय नरेश देउवालाई ठक्कर दिंएको थियो ।

ट्रकको ठक्करबाट देउवाको घटनास्थलमै मृत्यु भएपछि चालकलाई कारवाहीको माग गर्दै स्थानीयले स्याउले खण्ड अन्तरगत पूर्व पश्चिम राजमार्ग बन्द गरेका छन् । ट्रक चालक कपिलवस्तु ९ भर्तापुरका २५ वर्षीय सैलेश नेपालीलाई ट्रकसहित इलाका प्रहरी मालाखेतीले नियन्त्रणमा लगेको छ ।

यसैगरी घोडाघोडी नगरपालिका ५ डोकेबजारमा शनिबार ट्रकको ठक्करबाट मोटरसाइकल चालक बसन्तराज शर्माको मृत्यु भएपछि सोमबार देखिनै सुख्खडमा पनि स्थानीयले पूर्वपश्चिम राजमार्ग अवरुद्ध  गरेका छन् ।

स्थानीयले ट्रक चालकको खोजि गरी कारवाही गर्नुपर्ने माग राख्दै सो क्षेत्रमा सडक बन्द गरेका हुन् । शनिबार पश्चिमबाट पूर्वतर्फ गइरहेको सु.प.प्र.०१ ००८ प ५४७५ नम्बरको मोटरसाइकललाई विपरीत दिशाबाट आइरहेको लु १ ख ४६६६ नम्बरको ट्रकले ठक्कर दिएको थियो । ट्रकको ठक्करबाट मोटरसाईकल चारल शर्माको मृत्यू भएको थियो ।

जिल्ला प्रहरी कार्यालय कैलालीका अनुसार ट्रक चालकको पहिचान नखुलेका कारण उनलाई पक्राउ गर्न समस्या भएको छ । फरार ट्रक चालकको खोजिकार्य भइरहेको जिल्ला प्रहरी कार्यालय कैलालीका प्रमुख प्रहरी उपरिक्षक विश्व अधिकारीले बताए ।